លោក កុយ គួង រដ្ឋលេខាធិការ និងជាអ្នកនាំពាក្យក្រសួងការបរទេស បានបញ្ចេញប្រតិកម្មខ្លាំងៗជុំវិញការលាបពណ៌លោកជាមួយអតីតគណបក្សប្រឆាំងពីសំណាក់ក្រុមពួកប្រឆាំងនៅក្រៅប្រទេស។ លោក ថា បើឈប់បាន ឈប់ទៅ នូវគំនិតពុតត្បុតអាក្រក់ ឥតអៀនខ្មាស ដែលថា លោកជាអតីតប្រធានចលនាយុវជនជាតិខ្មែរ នៃគណបក្សសម រង្សី។
លើបណ្តាញទំនាក់ទំនងសង្គមហ្វេសប៊ុករបស់លោកនៅយប់ថ្ងៃពុធ ទី២ កុម្ភៈនេះ លោក កុយ គួង បានរៀបរាប់ក៏ដូចជាបរិយាយពាក់ព័ន្ធនឹងសាច់រឿងមួយចំនួនដែលក្រុមប្រឆាំងវាយប្រហារលោក ជាពិសេសបុគ្គល សោ ចាន់ដេត អតីតថ្នាក់ដឹកនាំ នៃអតីតគណបក្សសង្គ្រោះជាតិ។
លោក បានបន្តថា “ថ្មីៗនេះ បុគ្គលឈ្មោះ សោរ ចាន់ដេត (Sor Chandeth) ជាសមាជិកអតីតគណបក្សសង្គ្រោះជាតិ និងជាមនុស្សរបស់លោក សម រង្ស៊ី បានបង្ហោះសារតាមហ្វេសប៊ុក (Facebook) របស់ខ្លួន ដែលមានចំណងជើងថា “អ្នកបន្តវេន សម រង្ស៊ី ជានរណា?”។ លោក ថា “បុគ្គលនេះបានធ្វើការចោទប្រកាន់ដោយលាបពណ៌ដល់យុវជនជាច្រើននាក់ ក្នុងនោះបានលើកយកឈ្មោះរបស់ខ្ញុំ (កុយ គួង)ផង ដែលបានចាកចេញពីអតីតគណបក្ស សម រង្ស៊ី តាំងពីដើមឆ្នាំ២០០៨ មកចូលរួមរស់ជីវភាពនយោបាយជាមួយគណបក្សប្រជាជនកម្ពុជា និងបានប្រើការងារជូនគណបក្សប្រជាជនកម្ពុជា និងប្រទេសជាតិរហូតមកដល់បច្ចុប្បន្ននេះ ថានៅរក្សា “ឆន្ទៈ សម រង្ស៊ី និយម” ស្អីគេនោះ”។
ឆ្លើយតបទៅនឹងការចោទប្រកាន់ខាងលើនេះ លោក បានសង្កត់ធ្ងន់ថា លោកមិនដែលធ្វើជាប្រធានចលនាយុវជនជាតិខ្មែរ នៃគណបក្សសម រង្ស៊ី ម្តងណាឡើយ។ ដោយឡែកចលនាចាកចេញជាក្រុមធំពីអតីតគណបក្សសម រង្ស៊ី ដើមឆ្នាំ២០០៨ កើតឡើងដោយសារថ្នាក់ដឹកនាំគណបក្សនេះនិយាយផ្សេង ធ្វើផ្សឹង ហើយការដឹកនាំការងារគណបក្សផ្ទុយពីបទបញ្ជាផ្ទៃក្នុងគណបក្ស និងគោលការណ៍ប្រជាធិបតេយ្យ ដែលខ្លួនប្រកាសថា ជាគណបក្សប្រជាធិបតេយ្យធំជាងគេ។
និយាយពីលោក សម រង្ស៊ី វិញ លោក ថា “លោក សម រង្ស៊ី ដែលពេលនោះជាប្រធានគណបក្សសម រង្ស៊ី បានហៅការចាកចេញជាក្រុមធំនេះ ថាជាសាច់ស្អុយត្រូវកាត់ចេញពីគណបក្ស ដោយឥតស្តាយស្រណោះអ្វីឡើយ”។
លោក បន្តថា ផ្ទុយទៅវិញគណបក្សប្រឆាំង គណបក្សប្រជាជនកម្ពុជា បានយល់ព្រមទទួលស្វាគមន៍បងប្អូនដែលបានចាកចេញពីគណបក្ស សម រង្ស៊ីនាពេលនោះ និងជាបន្តបន្ទាប់ ដោយទឹកចិត្តទូលំទូលាយមានគុណធម៌ខ្ពស់ និងបានទទួលស្គាល់ជាសមាជិកគណបក្សប្រជាជនកម្ពុជាទាំងអស់ស្មើៗគ្នាដោយឥតរើសអើង ថាអ្នកចាស់ ឬអ្នកថ្មីឡើយ។
ជាងនេះទៀតគណបក្សប្រជាជនកម្ពុជា បានផ្តល់សេចក្តីទុកចិត្ត ហើយប្រគល់ការងារជាច្រើនជូនបងប្អូនទាំងអស់នោះ ទាំងក្នុងក្របខណ្ឌគណបក្ស និងក្របខណ្ឌរាជការទៅតាមចំណេះជំនាញរបស់ខ្លួនរហូតមកដល់បច្ចុប្បន្ននេះ។ នេះបើតាមការបញ្ជាក់របស់លោក កុយ គួង។
ចុងបញ្ចប់នៃសំណេររបស់លោក លោក កុយ គួង បានដាក់ជាសំណួរថា “តើបុគ្គល សោ ចាន់ដេត មានចេតនាអាក្រក់ពុតត្បុតកម្រិតណា ដែលបែរជាមកលាបពណ៌ដល់អ្នកដែល ត្រូវលោក សម រង្ស៊ី ហៅថាជាសាច់ស្អុយ ចាំបាច់ត្រូវកាត់ចេញពីគណបក្សតាំងពីឆ្នាំ២០០៨ហើយនោះ? តើបុគ្គល រូបនេះ យល់ឃើញថា ប្រធានរបស់ខ្លួន (សម រង្ស៊ី ) អស់ផ្លូវលែងមានអ្នកគាំទ្រ ឬដើរតាមទៀតហើយឬ ទើបមកលាបពណ៌មនុស្សដែលដើរចេញតាំងពីឆ្នាំ២០០៨ ថានៅរក្សា “ឆន្ទៈ សម រង្ស៊ី និយម” ទៀតនោះ?”៕
