ប្រធានាធិបតីរុស្ស៊ី លោក វ្ល៉ាឌីមៀ ពូទីន បានបញ្ជាកងទ័ពរបស់ខ្លួនឱ្យចូលទៅក្នុងតំបន់ចំនួនពីរដែលកាន់កាប់ដោយក្រុមពួកឧទ្ទាមនៅភាគខាងកើតអ៊ុយក្រែន បន្ទាប់ពីរុស្ស៊ីទទួលស្គាល់ថា តំបន់ទាំងពីរនោះគឺជារដ្ឋឯករាជ្យ។ ចំណែកអាមេរិកចាត់ទុកទង្វើរបស់រុស្ស៊ីបែបនេះ គឺជាលេសដើម្បីបង្កសង្គ្រាមតែប៉ុណ្ណោះ។ នេះបើយោងតាមការចុះផ្សាយរបស់សារព័ត៌មានប៊ីប៊ីស៊ី នៅថ្ងៃទី២២ កុម្ភៈនេះ។
លោក ពូទីន បន្តថា កងទ័ពរុស្ស៊ីមិនទាន់ត្រូវបានដាក់ពង្រាយនៅក្នុងតំបន់ទាំងពីរនោះនៅឡើយទេ។ ប៉ុន្តែលោកថា ការបញ្ជូនទាហានរបស់ខ្លួនទៅតំបន់ទាំងពីរនោះ គឺដើម្បីរក្សាសន្តិភាពក្នុងតំបន់ដែលខ្លួនបានគាំទ្រតាំងពីឆ្នាំ២០១៤មកម្ល៉េះ។
ការប្រកាសរបស់ប្រធានាធិបតីរុស្ស៊ីបែបនេះ ត្រូវបានប្រទេសជាច្រើនចេញមុខប្រកាសដាក់ទណ្ឌកម្មដើម្បីជាការឆ្លើយតបទៅនឹងសកម្មភាពរបស់ប្រទេសរុស្ស៊ីបែបនេះ។
ប្រឈមមុខនឹងស្ថានការណ៍បែបនេះ លោកប្រធានាធិបតីអ៊ុយក្រែន បានប្រកាសក្តែងៗថា ប្រទេសរបស់លោកមិនខ្លាចអ្វីទាំងអស់ ឬនរណានោះឡើយ។ តែទោះបីជាយ៉ាងនេះក្តី ប្រធានាធិបតី វ៉ូឡូឌីម៉ាយឺ ហ្សេឡេនស្កាយ (Volodymyr Zelenskyy) បានអំពាវនាវឱ្យមានការគាំទ្រឱ្យកាន់តែច្បាស់លាស់ និងមានប្រសិទ្ធភាពពីសំណាក់សម្ព័ន្ធមិត្តអន្តរជាតិរបស់ខ្លួន ខណៈដែលប្រទេសលោកកំពុងប្រឈមមុខកាន់តែខ្លាំងជាមួយរុស្ស៊ីនៅពេលនេះ។
លោក បានសង្កត់ធ្ងន់ថា “វាមានសារៈសំខាន់ខ្លាំងណាស់ក្នុងការមើលឃើញថា តើនរណាជាមិត្តពិត និងដៃគូរបស់យើង ហើយអ្នកណានឹងបន្តបន្លាចសហព័ន្ធរុស្ស៊ីដោយប្រើពាក្យតែប៉ុណ្ណោះ”៕
