ភ្នំពេញ៖ ក្រុមជនជាតិចិន បានជិះរថយន្ត ២គ្រឿង មកឈប់ រួចធ្វើសកម្មភាពបាញ់រះជាច្រើនគ្រាប់ទៅលើអគារខុនដូ THE SKY LINE ព្រមទាំងបាចខិត្តបណ្ណគំរាមថា (ប្រយ័ត្ននៅតាមផ្លូវ) បង្កឱ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចប៉ុសិ៍នគរបាលសង្កាត់មិត្តភាព ចុះមកអន្ដរាគមន៍ភ្លាមៗ។
ហេតុការណ៍នេះបានកើតឡើង កាលពីវេលាម៉ោង ២ និង៣៥ នាទី រំលងអធ្រាត្រ ឈានចូលថ្ងៃទី២០ ខែតុលា ឆ្នាំ២០២២ នៅតាមបណ្ដោយផ្លូវលេខ១៣៤ ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ។
បើតាមបណ្ដាញសារព័ត៌មានខ្មែរឈាន់មុខទទួលបានពីប្រភពកន្លែងកើតហេតុ បានឱ្យដឹងថា មុនពេលកើតហេតុគេឃើញក្រុមជនសង្ស័យ បានជិះរថយន្តចំនួន ២គ្រឿង គឺម៉ាក Ford ពណ៌ស និងម៉ាក Alphat ពណ៌ខ្មៅ តែមិនចាំស្លាកលេខ ដោយធ្វើដំណើរតាមបណ្ដោយផ្លូវលេខ១៣៤ ក្នុងទិសដៅពីលិចទៅកើត។ លុះធ្វើដំណើរមកដល់ចំណុចកើតហេតុខាងលើ រថយន្តទាំងពីរនោះ បានឈប់ហើយជនសង្ស័យដែលជិះក្នុងរថយន្ត Ford បានដកកាំភ្លើងខ្លីបាញ់រះប្រមាណ ១២គ្រាប់ សំដៅទៅលើអគារខុនដូ THE SKY LINE បណ្ដាលឱ្យធ្លុះធ្លាយ កញ្ចក់ ទ្វារ ជាច្រើនកន្លែង តែមិនបង្កឱ្យមានអ្នករងរបួសឡើយ។
បន្ទាប់ពីជនសង្ស័យ បានធ្វើសកម្មភាពបាញ់រះជាច្រើនគ្រាប់ រួចមក ក៏បានបាចខិត្តប័ណ្ណជាច្រើនសន្លឹកដែលមានរូបថតមនុស្សប្រុសស្រី ២នាក់ ភ្ជាប់ជាមួយអក្សរ ៣ ភាសា (ចិន វៀតណាម និងខ្មែរ) មានខ្លឹមសាថា (ប្រយ័ត្ននៅតាមផ្លូវ) នៅនឹងកន្លែងកើតហេតុ រួចក៏នាំគ្នាបើករថយន្តទៅទិសខាងកើតគេចខ្លួនបាត់ស្រមោលតែម្តង។
សូមបញ្ជាក់ជូនថា ក្រោយកើតហេតុសមត្ថកិច្ចប៉ុស្ដិ៍នគរបាលសង្កាត់មិត្ដភាព បានចុះមកពិនិត្យទីតាំងកន្លែងកើតហេតុ និងប្រមូលវត្ថុតាង ដើម្បីធ្វើការសាវជ្រាវតាមចាប់ជនសង្ស័យយកមកផ្ដន្ទាទោសទៅតាមច្បាប់ជាធរមាន៕ ដោយ៖ ឆឹម ទិត