សូមបន្តប្រុងប្រយ័ត្ន! ចាប់ពីថ្ងៃ១៩-២១ កម្ពុជានឹងបន្តមានភ្លៀងធ្លាក់ លាយឡំជាមួយផ្គររន្ទះ

ភ្នំពេញ ៖ ក្រសួងធនធានទឹកនិងឧតុនិយម បានចេញសេចក្ដីដំណឹង អំពីស្ថានភាពធាតុអាកាសនៅព្រះរាជាណាចក្រកម្ពុជាសម្រាប់ថ្ងៃទី១៩ ខែតុលា ឆ្នាំ២០២៣។

សេចក្ដីជូនដំណឹង បានឱ្យដឹងថា ប្រព័ន្ធសម្ពាធទាប (ITCZ) អូសបន្លាយកាត់ពីលើប្រទេសកម្ពុជាបានរលាយបាត់។ ខណៈវិសម្ពាធទាប (Tropical Depression) នៅលើសមុទ្រចិនខាងត្បូង បានវិវត្តទៅជាព្យុះត្រូពិចទី១៦ ឈ្មោះ សាន់បា T2316 (SANBA) និងរំកិលចូលទៅក្នុងឈូងសមុទ្រតុងកឹង ហើយព្យុះនេះពុំមានឥទ្ធិពលផ្ទាល់មកលើប្រទេសកម្ពុជាទេ។

ស្ថានភាពបែបនេះ នឹងធ្វើឱ្យកម្ពុជាចាប់ពីថ្ងៃទី១៩ ដល់ថ្ងៃទី២១ ខែតុលាឆ្នាំ២០២៣ នៅរាជធានីភ្នំពេញ និងនៅតាមបណ្តាខេត្តនានា អាចមានភ្លៀងធ្លាក់នៅក្នុងកម្រិតពីខ្សោយទៅមធ្យម ក្នុងនោះ តំបន់ខ្លះអាចមានភ្លៀងធ្លាក់បង្គួរលាយឡំនឹងផ្គររន្ទះ ជាមួយនឹងទំហំទឹកភ្លៀងធ្លាក់គ្របដណ្តប់លើផ្ទៃដីពី ៤០% ទៅ ៥០%៕