ភ្នំពេញ៖ យ៉ាងហោចណាស់ មានមនុស្សចំនួន៨នាក់បានស្លាប់ក្នុងករណីអគ្គិភ័យឆេះក្លឹបកំសាន្ត “6969 ឃីស អ៉ីនធើធេនមេន ឯ.ក” ស្ថិតនៅសង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ គិតត្រឹមម៉ោង១០ព្រឹកថ្ងៃទី០២ ខែកក្កដា ឆ្នាំ២០២៣នេះ។
ប្រភពសមត្ថកិច្ច ឱ្យដឹងថា ក្នុងចំណោមសាកសពទាំង៨នាក់នោះ មានជនជាតិចិន៦នាក់ (ប្រុស៥នាក់ និងស្រី១នាក់ ) និងជនជាតិវៀតណាម២នាក់ (ប្រុសកែភេទជាស្រី)។ សូមជំរាបជូនថា ហេតុការណ៍គ្រោះអគ្គិភ័យលើនេះ តាំងពីម៉ោងជិត៥ល្ងាច ថ្ងៃទី០១ ខែកក្កដា ឆ្នាំ២០២៣ នៅសង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ។
បើតាមប្រភពពីកន្លែងកើតហេុត មុនពេលកើតហេតុគេបានឃើញមានអណ្ដាតភ្លើងឆាបឆេះយ៉ាងខ្មួលខ្មាញ់សន្ធោសន្ធៅពីជាន់ខាងលើ និងមានមន្ត្រីនគរបាលបានចេញរថយន្តទៅអន្តរាគមន៍ភ្លាមៗ ប៉ុន្តែដោយសារស្ថានភាពអគារខ្ពស់ពុំអាចទប់ស្កាត់បាន ទើបបណ្តាលឱ្យមានមនុស្សជាប់គាំងនៅក្នុងអគាររហូតបាត់បង់ជីវិត៕
