ភ្នំពេញ៖ កម្លាំងប៉ុស្តិ៍នគរបាលរដ្ឋបាលបឹងកក់ទី២ នៃអធិការដ្ឋាននគរបាលខណ្ឌទួលគោក បានធ្វើការបង្ក្រាបឃាត់ខ្លួនជនសង្ស័យម្នាក់ ពីបទលួចសម្ភារៈ និងកាត់យកខ្សែភ្លើង ប្រព្រឹត្តនៅចំណុចផ្ទះលេខ៦១ ផ្លូវលេខ៣១៥ ក្រុមទី២៧ ភូមិ៦ សង្កាត់បឹងកក់ទី២ ខណ្ឌទួលគោក រាជធានីភ្នំពេញនៅថ្ងៃទី៣០ ខែឧសភា ឆ្នាំ២០២៣ វេលាម៉ោងប្រហែល ០៩:១០នាទី ។
សមត្ថកិច្ចឱ្យដឹងថា ជនរងគ្រោះ មោះ ធិន សៅ ភេទប្រុស អាយុ៦៣ឆ្នាំ ជនជាតិខ្មែរ ស្នាក់នៅផ្ទះលេខ៣១ ផ្លូវP08 បូរីជីបម៉ុងសែនសុខ សង្កាត់ភ្នំពេញថ្មី ខណ្ឌទួលគោក រាជធានីភ្នំពេញ។ រីឯ ជនសង្ស័យឈ្មោះ លាង ហេង ភេទប្រុស អាយុ២៣ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅបន្ទប់ជួល ផ្លូវរថភ្លើង ភូមិ៩ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។
ក្រោយធ្វើការឃាត់ខ្លួន សមត្ថកិច្ច បានចាប់យកវត្ថុតាងមួយចំនួនរួមមាន៖ កូនកាំបិតចិតបន្លែ ចំនួន០១, ទូល្វីស ចំនួន០៣, សោរមាត់ ចំនួន០៤, ម៉ាឡេត ចំនួន០១, កន្ត្រៃ ចំនួន០១, កន្ត្រៃកាត់ដែកមួយ (ជារបស់ជនសង្ស័យធ្វើសកម្មភាពលួច), ខ្សែភ្លើងធ្វើអំពីស្ពាន់ (ស្រាត) មួយដុំ (ជារបស់ជនរងគ្រោះដែលជនសង្ស័យរូបនេះកាត់យកស្ពាន់លក់) ចាប់យកពីជនសង្ស័យឈ្មោះ លាង ហេង ។
បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីធ្វើការសាកសួរ និងចាត់ការបន្តតាមនីតិវិធី៕