ភ្នំពេញ៖ លោក បណ្ឌិត សាម អ៊ីន ថ្លែងថា ការលាឈប់របស់លោក ពីគណបក្សប្រជាធិបតេយ្យមូលដ្ឋាន GDP សម្រេចទៅចូលរួមជីវភាពនយោបាយជាមួយគណបក្សប្រជាជន CPP មានការអបអរសាទរ ការខកចិត្ត និងការខឹងសម្បារពីមហាជន។
តាមរយៈបណ្តាបណ្តាញសង្គមនៅថ្ងៃទី ៣ ខែមេសា ឆ្នាំ ២០២៣ លោកបានអរគុណចំពោះសារអបអរសាទរ ហើយចំពោះសារខកចិត្ត និងការខឹងសម្បារ លោក យល់អំពីអារម្មណ៍របស់អ្នក។
លោកបញ្ជាក់ថា ភ្ជាប់ខាងក្រោមរូបភាព គឺជាគោលគំនិត និងផែនការ៦ចំណុច ដែលលោក បានដាក់ស្នើរទៅសម្តេចនាយករដ្ឋមន្រ្តី ហ៊ុន សែន និង លោក រដ្ឋមន្រ្តី សាយ សំអាល់ សម្រាប់ចូលរួមជួយការងារក្រសួងបរិស្ថាន ដែលទាក់ទងនឹងការអភិវឌ្ឍអេកូទេចរណ៍ ការលើកស្ទួយសិទ្ធិនិងជីវភាពរស់នៅរបស់ប្រជាពលរដ្ឋនៅមូលដ្ឋានរស់នៅក្បែរតំបន់ការពារធម្មជាតិ និងការលើកម្ពស់ការយល់របស់មហាជនអំពីតំបន់ការពារធម្មជាតិនៅកម្ពុជា។
លោកពន្យល់ថា «សម្រាប់ផែនការទី១ ខ្ញុំ និងមានការសហការច្រើនជាមួយការងាររបស់ លោកបណ្ឌិត យ៉ង សាំងកុមារ ហើយត្រូវការការគាំទ្រពី ឯ.ឧ រដ្ឋមន្រ្តី ក្រសួងបរិស្ថាន កសិកម្ម និង ទេសចរណ៍។ខ្ញុំសង្ឃឹមថា ភារកិច្ចថ្មីនេះ ជាមួយក្រសួងបរិស្ថាន នឹងផ្តល់កម្លាំងចិត្ត និងឋាមពលជាថ្មីដល់ជីវិតខ្ញុំ ដែលនៅសេសសល់ ដើម្បីចូលរួមបម្រើប្រទេសជាតិជាទីស្រឡាញ់របស់ខ្ញុំ»។
លោកដឹងថា លោកមិនអាចធ្វើអ្វីបានគ្រប់យ៉ាងតាមចិត្តលោកចង់ទេ តែយ៉ាងហោចណាស់ លោកអាចធ្វើរឿងមួយចំនួន ដែលផ្តល់ជាប្រយោជន៍ដល់ការអភិរក្សនិងការពារធនធានធម្មជាតិ ដល់ប្រជាពលរដ្ឋមូលដ្ឋានរស់នៅជាប់តំបន់ការពារធម្មជាតិ និងដល់ក្រសួងបរិស្ថាន។ ប្រសិនបើ លោកមិនអាចធ្វើអ្វីបានសោះ នោះពុំមានហេតុផលអ្វី ដែលលោកត្រូវបន្តទទួលយកនូវឋានៈតួនាទីដ៏ខ្ពស់ប្រកបដោយកិត្តិយសនេះទេ។
លោកថ្លែងថា៖ « ចូលទៅបម្រើក្នុងក្រសួងបរិស្ថាន ខ្ញុំនឹងពាំនាំយកទៅជាមួយនូវទឹកចិត្តចង់ជួយ និងចង់ក្លាយជាចំណែកនៃដំណោះស្រាយ»៕
