ភ្នំពេញ៖ សាលារាជធានីភ្នំពេញ នឹងបញ្ចេញរថយន្តក្រុងចំនួន១៧៥គ្រឿងសម្រាប់ដឹកពលរដ្ឋចេញទៅស្រុកកំណើតដោយមិនគិតថ្លៃរយៈពេល៥ថ្ងៃ ក្នុងឱកាសបុណ្យភ្ជុំបិណ្ឌ ចាប់ពី ថ្ងៃទី២៣-២៧កញ្ញាឆ្នាំ២០២២។
យោងតាមសេចក្ដីជូនដំណឹងរបស់សាលារាជធានីភ្នំពេញ រថយន្តក្រុង៥៥គ្រឿងសម្រាប់ដឹកពលរដ្ឋនៅរាជធានីភ្នំពេញ។ ដោយឡែក អ្នកដំណើរទៅតាមខេត្តវិញ សាលារាជធានីនឹងប្រើប្រាស់រថយន្តចំនួន១២០គ្រឿងសម្រាប់ដឹកអ្នកដំណើរត្រឡប់ទៅមក។ការចេញដំណើរពីភ្នំពេញចាប់ពីម៉ោង៥៖៣០ព្រឹក។
ជាមួយគ្នានេះ សាលារាជធានីភ្នំពេញ បានអំពាវនាវដល់ម្ចាស់ក្រុមហ៊ុន និងម្ចាស់រថយន្តដឹកជញ្ជូនអ្នកដំណើរឱ្យរក្សាតម្លៃដឹកជញ្ជូននៅដដែល ដោយពុំដំឡើងតម្លៃ ក្នុងពិធីបុណ្យភ្ជុំបិណ្ឌ ដើម្បីរួមចំណែកជាមួយរដ្ឋាភិបាល ក្នុងការជួយសម្រួលដល់ជីវភាពរបស់ពលរដ្ឋ។
ចំពោះទីតាំងចេញដំណើរតាមបណ្តាខេត្ត សាលារាជធានីភ្នំពេញបានកំណត់ដូចខាងក្រោម៖
១. ផ្លូវជាតិលេខ១ ភ្នំពេញ -កណ្តាល-ស្វាយរៀង មានរថយន្តចំនួន៥គ្រឿង ទីតាំងផ្លូវ៦០ម៉ែត្រ( ទល់មុខក្រុមហ៊ុនម៉ែកស៊ីដែស) ចំណតរថយន្តទីរួមខេត្តស្វាយរៀង។
២. ភ្នំពេញ-កណ្តាល-ព្រៃវែង មានរថយន្តចំនួន៥គ្រឿង គោលដៅចេញដំណើរ ផ្លូវ៦០ម៉ែត្រ(ទល់មុខក្រុមហ៊ុនម៉ែកស៊ីដែស) ចំណតរថយន្តទីរួមខេត្តព្រៃវែង។
៣. ផ្លូវជាតិលេខ២ ភ្នំពេញ-កណ្តាល-តាកែវ រថយន្តចំនួន៥គ្រឿង ទីតាំងផ្លូវ៦០ម៉ែត្រ( ទល់មុខក្រុមហ៊ុនម៉ែកស៊ីដែស) ចំណតរង្វង់មូលអូរចំបក។
៤. ផ្លូវជាតិលេខ៣ ភ្នំពេញ- កែប ចំនួន៥គ្រឿង ផ្សារសិនជូរីផ្លាហ្សា ទីតាំងសាលាបឋមសិក្សាដំណាក់ចង្អើរ។ ចំណែកពី ភ្នំពេញ- កំពត មានចំនួន៥គ្រឿង ផ្សារសិនជូរីផ្លាហ្សា ចំណតរថយន្តទីរួមខេត្តកំពត។
៥. ផ្លូវជាតិលេខ៤ ភ្នំពេញ- កំពង់ស្ពឺ មានរថយន្ត០៣គ្រឿង ផ្សារសិនជូរីផ្លាហ្សា ចំណតរថយន្តផ្សារកំពង់ស្ពឺ។
៦. ពីភ្នំពេញ- ព្រះសីហនុ មានចំនួន០៧គ្រឿង ចំណតរថយន្តវិមានឯករាជ្យខេត្តព្រះសីហនុ។
៧. ផ្លូវជាតិលេខ៥ ភ្នំពេញ -កំពង់ឆ្នាំង មានចំនួន៥គ្រឿង ចំណតរថយន្តផ្សារលើ។
៨.ភ្នំពេញ -ពោធិ៍សាត់ មានចំនួន១០គ្រឿង ទីតាំងបុរីឧកញ៉ា ភូ ប៉ុយ។
៩.ភ្នំពេញ- បាត់ដំបង ១៥គ្រឿង ចំណតផ្សារប៉ុមប៉ុយ ។
១០. ភ្នំពេញ -បន្ទាយមានជ័យ១៥គ្រឿង រង្វង់មូលទេពមច្ឆា(ជ្រោយចង្វា) ចំណតរថយន្តថ្មី ក្រុងសេរីសោភ័ណ្ឌ។
១១. ផ្លូវជាតិលេខ៦ ភ្នំពេញ- កំពង់ធំ មានចំនួន៥គ្រឿង ទីតាំងភោជនីយដ្ឋានស្ទឹងសែន។ ភ្នំពេញ សៀបរាប មានចំនួន១៥គ្រឿង ចំណតផ្លូវ៦០ម៉ែត្រខេត្តសៀបរាប។
១២. ផ្លូវជាតិលេខ ៦,៧ ភ្នំពេញ កំពង់ចាម មានចំនួន៥គ្រឿង មុខរាជាយស្ម័យយាន ចំណតរថយន្តខេត្ត។ ភ្នំពេញ ត្បូងឃ្មុំ មានចំនួន០៥គ្រឿង មុខរាជាយស្ម័យយាន ចំណតផ្សារសួង។
១៣.ផ្លូវជាតិលេខ៨ ភ្នំពេញ- ក្រចេះ ០៥គ្រឿង ទីតាំងមន្ទីវប្បធម៍ និងវិចិត្រសិល្បះ ខេត្ត(រង្វង់មូលព្រាបស)។ ភ្នំពេញ- ស្ទឹងត្រែង មានចំនួន៥គ្រឿង ចំណតរថយន្តខេត្តស្ទឹងត្រែង៕
ដោយ៖ គង់ សេដ្ឋាមុនី