ភ្នំពេញ៖ រាជរដ្ឋាភិបាល បានធ្វើការណែនាំមួយចំនួន ដល់ក្រុមការងាររាជរដ្ឋាភិបាលចុះមូលដ្ឋាននានា ដោយបានកំណត់ អំពីតួនាទី ភារកិច្ច និងរបៀបរបបការងារមួយចំនួន ដើម្បីលើកកម្ពស់ប្រសិទ្ធភាពការងារឱ្យកាន់តែមានគុណភាព។នេះបើយោងតាមសេចក្ដីណែនាំ របស់រាជរដ្ឋាភិបាល នៅថ្ងៃទី២ ខែធ្នូ ឆ្នាំ២០២៣។
សេចក្ដីណែនាំ បានឱ្យដឹងថា រាជរដ្ឋាភិបាលបានរៀបចំក្រុមការងាររាជរដ្ឋាភិបាលចុះមូលដ្ឋាន ដោយបានចាត់តាំងសមាជិក សមាជិកា រាជរដ្ឋាភិបាល និងមន្ត្រីរាជការតាមក្រសួង ស្ថាប័ន ជាសមាសភាពក្នុងក្រុមការងារនេះជាបន្តបន្ទាប់ សំដៅចូលរួម គាំទ្រ និងជំរុញការអនុវត្តកម្មវីធីនយោបាយ យុទ្ធសាស្ត្រ គោលនយោបាយ និងកម្មវិធីកំណែទម្រង់នានារបស់ រាជរដ្ឋាភិបាល ដើម្បីបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋនៅតាមមូលដ្ឋាននានា និងចូលរួម បំផុសចលនាឱ្យមានការគាំទ្រ ការចូលរួមពីប្រជាពលរដ្ឋគ្រប់មជ្ឈដ្ឋានក្នុងការកសាងអភិវឌ្ឍប្រទេសជាតិឱ្យមាន ការរីកចម្រើនលើគ្រប់វិស័យ។
ផ្អែកលើសមិទ្ធផលនៃការអនុវត្តយុទ្ធសាស្ត្រត្រីកោណ និងយុទ្ធសាស្ត្រចតុកោណទាំង៤ ដំណាក់កាល នារយៈពេល២៥ឆ្នាំ កន្លងមក រាជរដ្ឋាភិបាលសម្រាប់នីតិកាលទី៧ នៃរដ្ឋសភា បានសម្រេចដាក់ចេញនូវយុទ្ធសាស្ត្រ បញ្ចកោណដំណាក់កាលទី១ និងបានសម្រេចបន្តចាត់តាំងក្រុមការងាររាជរដ្ឋាភិបាលចុះមូលដ្ឋាន ដើម្បីចូលរួមគាំទ្រ និងជំរុញការអនុវត្តកម្មវិធីនយោបាយ យុទ្ធសាស្ត្របញ្ចកោណ ផែនការយុទ្ធសាស្ត្រអភិវឌ្ឍន៍ជាតិ គោលនយោបាយ និងកម្មវិធីកំណែទម្រង់នានារបស់រាជរដ្ឋាភិបាល ឱ្យបានសកម្មផុលផុសនៅតាមមូលដ្ឋាន ដើម្បីរួមគ្នាបន្តជំរុញ ការអភិវឌ្ឍប្រទេសជាតិឱ្យឈានចូលដំណាក់កាលថ្មី សំដៅឈានឆ្ពោះទៅសម្រេចបានចក្ខុវិស័យកម្ពុជាឆ្នាំ២០៥០។
ដើម្បីលើកកម្ពស់ប្រសិទ្ធភាពក្នុងការចុះបំពេញការងារនៅតាមមូលដ្ឋាននានា រាជរដ្ឋាភិបាលកំណត់អំពី តួនាទី ភារកិច្ច និងរបៀបរបបការងាររបស់ក្រុមការងាររាជរដ្ឋាភិបាលចុះមូលដ្ឋាន មួយចំនួនរួមមាន៖ តួនាទីនិងភារកិច្ចៈ ក្រុមការងាររាជរដ្ឋាភិបាលចុះមូលដ្ឋានមានតួនាទីតម្រង់ទិស គាំទ្រ និងជំរុញការលើកកម្ពស់សមត្ថភាព ស្ថាប័ននៅមូលដ្ឋាន ដើម្បីពង្រឹងការទទួលខុសត្រូវ និងភាពជាម្ចាស់របស់មូលដ្ឋានក្នុងការអនុវត្តកម្មវិធីនយោបាយ យុទ្ធសាស្ត្របញ្ចកោណដំណាក់កាលទី១ គោលនយោបាយ និងកម្មវិធីកំណែទម្រង់នានារបស់រាជរដ្ឋាភិបាលសំដៅធ្វើការអភិវឌ្ឍមូលដ្ឋាន ការលើកកម្ពស់ការផ្តល់សេវាសាធារណៈ និងការដោះស្រាយឆ្លើយតបសំណើ សំណូមពរ និងសេចក្តីត្រូវការរបស់ប្រជាពលរដ្ឋនៅតាមមូលដ្ឋាននីមួយៗ ប្រកបដោយប្រសិទ្ធភាព តម្លាភាព និងគណនេយ្យភាព។
ដោយឡែកចំពោះរបៀបរបបការងារៈ ប្រធានក្រុមការងាររាជរដ្ឋាភិបាលចុះមូលដ្ឋានរាជធានី ខេត្ត ត្រូវមានការទទួលខុសត្រូវដឹកនាំ ណែនាំ និងត្រួតពិនិត្យសកម្មភាពរបស់ក្រុមការងាររាជរដ្ឋាភិបាលចុះមូលដ្ឋានគ្រប់ថ្នាក់នៃរាជធានី ខេត្ត នីមួយៗ។ ប្រធានក្រុមការងាររាជរដ្ឋាភិបាលចុះមូលដ្ឋានក្រុង ស្រុក ឃុំ សង្កាត់ ត្រូវមានការទទួលខុសត្រូវ ក្នុងការដឹកនាំ និងចាត់ចែងអនុវត្តការងារចុះមូលដ្ឋានក្នុងក្រុមការងាររបស់ខ្លួន ផ្អែកតាមការណែនាំរបស់ រាជរដ្ឋាភិបាល និងក្រុមការងាររាជរដ្ឋាភិបាលចុះមូលដ្ឋានរាជធានី ខេត្ត។ អនុប្រធាន និងសមាជិកក្រុមការងាររាជរដ្ឋាភិបាលចុះមូលដ្ឋាននីមួយៗ ត្រូវបំពេញការងារតាម ការចាត់តាំង ការប្រគល់ភារកិច្ច និងចូលរួមប្រជុំតាមការកំណត់របស់ប្រធានក្រុមការងារ។
រដ្ឋមន្ត្រីក្រសួង ប្រធានស្ថាប័ននានា ត្រូវប្រគល់ភារកិច្ចជូនអង្គភាពជាក់លាក់ណាមួយ ឬអាច រៀបចំឱ្យមានមន្ត្រីបង្គោលក្នុងក្រសួង ស្ថាប័នសាមី ដើម្បីធ្វើជាសេនាធិការក្នុងការសម្របសម្រួលសកម្មភាព ការងារចុះមូលដ្ឋាន និងបូកសរុបសកម្មភាពតំណាងក្រសួង ស្ថាប័នរបស់ខ្លួន ដែលបានចូលរួមក្នុងក្រុមការងារ រាជរដ្ឋាភិបាលចុះមូលដ្ឋាន ព្រមទាំងការដោះស្រាយឆ្លើយតបបញ្ហាប្រឈមនានានៅមូលដ្ឋានដែលពាក់ព័ន្ធ សមត្ថកិច្ចក្រសួង ស្ថាប័នសាមី។ ក្រុមការងាររាជរដ្ឋាភិបាលចុះមូលដ្ឋានរាជធានី ខេត្ត ត្រូវណែនាំដល់អភិបាលនៃគណៈអភិបាល រាជធានី ខេត្ត អភិបាលនៃគណៈអភិបាលក្រុង ស្រុក ខណ្ឌ ដើម្បីរៀបចំបង្កើតនូវលេខាធិការដ្ឋានសម្រាប់ធ្វើជា សេនាធិការដល់ក្រុមការងាររាជរដ្ឋាភិបាលចុះមូលដ្ឋាន ដែលស្ថិតក្នុងសាលារាជធានី ខេត្ត និងសាលាក្រុង ស្រុក ខណ្ឌនីមួយៗ។ ក្រុមការងាររាជរដ្ឋាភិបាលចុះមូលដ្ឋានឃុំ សង្កាត់ ត្រូវសហការជាមួយរដ្ឋបាលឃុំ សង្កាត់សាមីធ្វើការ ចាត់តាំងមន្ត្រីបង្គោល ដើម្បីធ្វើជាសេនាធិការក្នុងសកម្មភាពការងារចុះមូលដ្ឋាន។
ក្នុងការចុះបំពេញការងារនៅមូលដ្ឋាន ក្រុមការងាររាជរដ្ឋាភិបាលចុះមូលដ្ឋានពុំមានតួនាទី ឬសិទ្ធិ សម្រេចកិច្ចការជំនួសក្រសួង ស្ថាប័ន រដ្ឋបាលថ្នាក់ក្រោមជាតិ មន្ទីរ អង្គភាពជំនាញនានាឡើយ។ រដ្ឋមន្ត្រីក្រសួង ប្រធានស្ថាប័ន អាជ្ញាធរ រដ្ឋបាលថ្នាក់ក្រោមជាតិ មន្ទីរ អង្គភាពជំនាញនានា ត្រូវមានការទទួលខុសត្រូវលើកិច្ចការ នានាដែលស្ថិតក្នុងសមត្ថកិច្ចរបស់ខ្លួនស្របតាមច្បាប់ និងលិខិតបទដ្ឋានគតិយុត្តជាធរមាន។ ប្រធានក្រុមការងាររាជរដ្ឋាភិបាលចុះមូលដ្ឋាននីមួយៗ ត្រូវចាត់ឱ្យអនុប្រធាន ឬសមាជិកក្រុមការងារដែលជាតំណាងក្រសួង ស្ថាប័ន ឬអាជ្ញាធរពាក់ព័ន្ធ សហការសម្របសម្រួលក្នុងក្រសួង ស្ថាប័នសាមី ឬអាជ្ញាធរ មានសមត្ថកិច្ចពាក់ព័ន្ធ ធ្វើការដោះស្រាយនូវបញ្ហាប្រឈម សំណើ សំណូមពរនានារបស់មូលដ្ឋាន និងត្រូវធ្វើ ការតាមដាន ត្រួតពិនិត្យ និងជំរុញសកម្មភាពដោះស្រាយបញ្ហាទាំងនោះ ដោយផ្អែកលើច្បាប់ លិខិតបទដ្ឋាន គតិយុត្ត គោលនយោបាយ និងវិធានការរបស់រាជរដ្ឋាភិបាល។ ករណ៏មិនអាចដោះស្រាយបាន ប្រធានក្រុមការងារ រាជរដ្ឋាភិបាលចុះមូលដ្ឋានរាជធានី ខេត្ត អាចជួបពិភាក្សា ឬស្នើសុំឱ្យរដ្ឋមន្ត្រីក្រសួង ប្រធានស្ថាប័នពាក់ព័ន្ធដើម្បី ចាត់វិធានការដោះស្រាយស្របតាមសមត្ថកិច្ចនៃក្រសួង ស្ថាប័ននីមួយៗ។
ករណីនៅតែមិនអាចដោះស្រាយបាន ប្រធានក្រុមការងាររាជរដ្ឋាភិបាលចុះមូលដ្ឋានរាជធានី ខេត្ត ត្រូវបញ្ជូនមកលេខាធិការដ្ឋានក្រុមការងាររាជរដ្ឋាភិបាល ចុះមូលដ្ឋាន ដើម្បីធ្វើការបូកសរុបរាយការណ៍ជូនប្រមុខរាជរដ្ឋាភិបាលពិនិត្យនិងសម្រេច។ ប្រធានក្រុមការងាររាជរដ្ឋាភិបាលចុះមូលដ្ឋាន អាចអញ្ជើញអាជ្ញាធរ រដ្ឋបាលថ្នាក់ក្រោមជាតិ មន្ទីរ អង្គភាពពាក់ព័ន្ធនានានៅមូលដ្ឋាន ចូលរួមប្រជុំពិភាក្សាការងារតាមការចាំបាច់។ ក្រុមការងាររាជរដ្ឋាភិបាលចុះមូលដ្ឋានគ្រប់ថ្នាក់ ត្រូវកំណត់របបប្រជុំ និងធ្វើរបាយការណ៍បូកសរុប លទ្ធផលការងារយ៉ាងតិចមួយត្រីមាសម្តង ព្រមទាំងអាចកោះប្រជុំតាមការចាំបាច់ និងធ្វើរបាយការណ៍មក លេខាធិការដ្ឋាននៃក្រុមការងាររាជរដ្ឋាភិបាលចុះមូលដ្ឋាន ដើម្បីបូកសរុបរាយការណ៍ជូនរាជរដ្ឋាភិបាល។
ពាក់ព័ន្ធការចាត់តាំងក្រុមការងាររាជរដ្ឋាភិបាលចុះមូលដ្ឋានវិញៈ អនុប្រធានក្រុមការងាររាជរដ្ឋាភិបាលចុះមូលដ្ឋានរាជធានី ខេត្តនីមួយៗ ត្រូវពិគ្រោះពិភាក្សារៀបចំចាត់តាំងក្រុមការងាររាជរដ្ឋាភិបាលចុះមូលដ្ឋានក្រុង-ស្រុក-ខណ្ឌ-ឃុំ-សង្កាត់ក្នុងរាជធានី-ខេត្តសាមី ដោយសេចក្តីសម្រេចរបស់ប្រធានក្រុមការងាររាជរដ្ឋាភិបាលចុះមូលដ្ឋានរាជធានី-ខេត្តនីមួយៗឱ្យ បានរួចរាល់យ៉ាងយូរត្រឹមដំណាច់ខែធ្នូ ឆ្នាំ២០២៣។ ប្រធាន អនុប្រធានក្រុមការងាររាជរដ្ឋាភិបាលចុះមូលដ្ឋានឃុំ សង្កាត់នីមួយៗ ត្រូវពិគ្រោះពិភាក្សា ដើម្បីបែងចែកសមាសភាពក្រុមការងារឱ្យចុះទទួលតាមភូមិនានាក្នុងឃុំ សង្កាត់ ស្នើមកប្រធានក្រុមការងារ រាជរដ្ឋាភិបាលចុះមូលដ្ឋានក្រុង ស្រុក ខណ្ឌសាមី ដើម្បីពិនិត្យ និងសម្រេចចាត់តាំងក្រុមការងារចុះតាមភូមិក្នុង ឃុំ សង្កាត់នីមួយៗតាមការចាំបាច់ ឱ្យបានរួចរាល់យ៉ាងយូរត្រឹមដំណាច់ខែមករា ឆ្នាំ២០២៤។
រាជរដ្ឋាភិបាលប្រគល់ភារកិច្ចជូន លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រី ទទួលបន្ទុកទីស្ដីការគណៈរដ្ឋមន្ត្រី ធ្វើជាសេនាធិការជូននាយករដ្ឋមន្ត្រីក្នុងការសម្របសម្រួលកិច្ចការរបស់ ក្រុមការងាររាជរដ្ឋាភិបាលចុះមូលដ្ឋាន។ រដ្ឋមន្ត្រីក្រសួង ប្រធានស្ថាប័ននានា និងរដ្ឋបាលថ្នាក់ក្រោមជាតិ ត្រូវអនុវត្តសេចក្តីណែនាំនេះឱ្យមាន ប្រសិទ្ធភាព៕