ប្រជាពលរដ្ឋ និងយុវជនខ្មែរ ព្រមទាំងពលរដ្ឋកូរ៉េ បានចេញមកទទួលស្វាគមន៍ សម្តេច ហ៊ុន សែន នាយករដ្ឋមន្ត្រីនៃកម្ពុជា គ្រាដែលសម្តេច បានអញ្ជើញដល់សណ្ឋាគារស្នាក់នៅក្នុងទីក្រុងសេអ៊ូល ប្រទេសកូរ៉េ។ នេះបើយោងតាមផេកផ្លូវការរបស់សម្តេច ដែលបានបង្ហោះនៅថ្ងៃទី១០ ខែកុម្ភៈ ឆ្នាំ២០២២។
ប្រភពដដែល បានបញ្ជាក់ថា សកម្មភាពចេញមកទទួលស្វាគមន៍សម្តេចនាយករដ្ឋមន្ត្រីនេះ គឺជាបង្ហាញនូវការគោរពស្រឡាញ់គាំទ្រចំពោះសម្តេច ហ៊ុន សែន ដែលបានធ្វើឱ្យប្រទេសជាតិមានសុខសន្តិភាព និងរីកចម្រើនមកទល់សព្វថ្ងៃ និងបានចូលរួមខិតខំជួយជំរុញនិងលើកតម្កើងនូវសន្តិភាពដល់ពិភពលោកទៀតផង។
គួរជម្រាបជូនថា សម្តេចនាយករដ្ឋមន្ត្រី និងគណៈប្រតិភូកម្ពុជា បានចាកចេញពីកម្ពុជានៅព្រឹកថ្ងៃទី១០ កុម្ភៈនេះ ទៅបំពេញទស្សនកិច្ចនៅប្រទេសកូរ៉េខាងត្បូង និងធ្វើជាសហប្រធានកិច្ចប្រជុំកំពូលសន្តិភាពពិភពលោកឆ្នាំ២០២២ ក្រោមមូលបទ “ឆ្ពោះទៅកាន់សន្តិភាពនៅឧបទ្វីបកូរ៉េ”។
ក្នុងអំឡុងពេលស្នាក់នៅទីក្រុងសេអ៊ូលនោះ សម្តេចនឹងមានជំនួបជាមួយលោក មូន ចេ-អ៊ីន (Moon Jae-in) ប្រធានាធិបតីនៃសាធារណរដ្ឋកូរ៉េ ដើម្បីពិភាក្សាអំពីទំនាក់ទំនង និងកិច្ចសហប្រតិបត្តិការទ្វេភាគី រួមមាន កិច្ចសហប្រតិបត្តិការលើវិស័យនយោបាយ សេដ្ឋកិច្ច និងសង្គម-វប្បធម៌។ល។ សម្តេច នឹងមានជំនួបជាមួយលោក បាន គី-មូន (Ban Ki-moon) អតីតអគ្គលេខាធិការអង្គការសហប្រជាជាតិ និងជួបឥស្សរជននយោបាយ និងធុរជនផ្សេងទៀតផងដែរ៕
