ភ្នំពេញ៖ “ពិធីបិទជាផ្លូវការព្រឹត្តិការណ៍កីឡាអាស៊ានប៉ារ៉ាហ្គេមលើកទី១២ ឆ្នាំ២០២៣- នឹងប្រព្រឹត្តទៅនៅថ្ងៃ ទី០៩ ខែមិថុនា ឆ្នាំ ២០២៣ នៅវិមានកីឡដ្ឋាន ពហុកីឡដ្ឋានជាតិមរតកតេជោ ក្រោមអធិបតីភាព សម្ដេច ហ៊ុន សែន នាយករដ្ឋមន្ត្រីនៃកម្ពុជា និងសម្ដេច ប៊ុន រ៉ានី ហ៊ុនសែន។
នេះបើតាមសេចក្តីជូនដំណឹង របស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ (CAMSOC-CAMAPGOC)នៅថ្ងៃទី៥ ខែមិថុនា ឆ្នាំ២០២៣។
ក្នុងន័យនេះ គណៈកម្មាធិការជាតិ CAMSOC-CAMAPGOC សូមគោរពអញ្ជើញ សាធារណជនជាតិ-អន្តរជាតិ មកចូលរួមទស្សនា”ពិធីបិទជាផ្លូវការព្រឹត្តិការណ៍ កីឡាអាស៊ានប៉ារ៉ាហ្គេមលើកទី១២” តាមកាលបរិច្ឆេទ និងទីកន្លែងដូចបានគោរពជម្រាបជូនខាងលើឱ្យបានច្រើនកុះករ ។
ចំពោះបណ្ណចូលទស្សនា និងបណ្ណរថយន្ត សូមប្រើប្រាស់ឡើងវិញនូវបណ្ណដែលគណៈកម្មាធិការជាតិបានផ្ដល់ជូនក្នុងពេល ពិធីបើកជាផ្លូវការព្រឹត្តិការណ៍កីឡាអាស៊ានប៉ារ៉ាហ្គេមលើកទី១២. ឆ្នាំ២០២៣ កាលពីថ្ងៃទី០៣ ខែមិថុនា ឆ្នាំ២០២៣ កន្លងមក និងសូមអញ្ជើញមកដល់ពហុកីឡដ្ឋានជាតិមរតកតេជោនៅវេលាម៉ោង១៦:០០នាទីរសៀល ដោយរក្សាទីតាំង កន្លែងអង្គុយដូចដែលមានកំណត់ក្នុងបណ្ណទស្សនារួចហើយ៕
