ភ្នំពេញ៖ លោក Justin Kevin Wayatt ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសអូស្រ្តាលី ប្រចាំព្រះរាជាណាចក្រកម្ពុជាបានបង្ហាញសុច្ឆនៈយ៉ាងមុតមាំ ក្នុងការពង្រឹងទំនាក់ទំនងកិច្ចសហប្រតិបត្តិការរវាងប្រទេសទាំងពីរ ប្រកបដោយប្រសិទ្ធភាពខ្ពស់ ក៏ដូចជាការជំរុញ និងពង្រឹងទំនាក់ទំនងរវាងវិនិយោគិនឯកជនពីប្រទេសអូស្ត្រាលី លើកិច្ចសហប្រតិបត្តិការជាមួយកម្ពុជាក្នុងវិស័យហេដ្ឋរចនាសម្ព័ន្ធដឹកជញ្ជូន និងភស្តុភារកម្ម។
ការបង្ហាញឆន្ទៈយ៉ាងមុតមាំរបស់លោក Justin Kevin Wayatt ធ្វើឡើងនៅថ្ងៃទី១៩ ខែមេសា ឆ្នាំ២០២៣ ក្នុងពេលលោក ចូលជួបសម្តែងការគួរសម និងពិភាក្សាការងារជាមួយលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ។
ជាមួយគ្នានេះ លោក Justin Kevin Wayatt បានសម្តែងនូវសេចក្តីរីករាយ ដែលបានវិលត្រឡប់មកបំពេញការងារនៅព្រះរាជាណាចក្រកម្ពុជាម្តងទៀត បន្ទាប់ពីរយៈពេលជាង២០ឆ្នាំកន្លងមក ព្រមទាំងបានស្ងើចសរសើរ និងវាយតម្លៃខ្ពស់ចំពោះវឌ្ឍនភាព និងការអភិវឌ្ឍលើគ្រប់វិស័យរបស់ប្រទេសកម្ពុជា ជាពិសេសវិស័យហេដ្ឋរចនាសម្ព័ន្ធដឹកជញ្ជូន ដែលមានការរីកចម្រើនគួរឱ្យកត់សម្គាល់។
ទន្ទឹមនឹងនេះ លោក ឯកអគ្គរដ្ឋទូត ក៏បានបង្ហាញពីចំណាប់អារម្មណ៍លើប្រព័ន្ធភស្តុភារកម្ម និងឃ្លាំងស្តុកទំនិញត្រជាក់ក្នុងការគាំទ្រដល់ការអភិវឌ្ឍសេដ្ឋកិច្ចនៅកម្ពុជា។ ប្រតិបត្តិការឃ្លាំងផ្ទេរផ្ទុកទំនិញត្រជាក់នេះ នឹងផ្តល់សេវាកម្មភស្តុភារកម្ម ដែលអាចគ្រប់គ្រងសីតុណ្ណភាព Temperature Controlled Logistics (TCD) ការដឹកជញ្ជូនក្នុងរយៈពេលវែង និងជួយចូលរួមលើកស្ទួយសេដ្ឋកិច្ចជាតិ ដូចជាជួយផ្តល់ឱកាសការងារដល់ប្រជាជន បម្រើដល់ក្រុមហ៊ុនកសិឧស្សាហកម្ម ក្រុមហ៊ុនកែច្នៃម្ហូបអាហារ ក្រុមហ៊ុនឱសថ ក្រុមហ៊ុនលក់រាយផ្នែកចំណីអាហារ និងអាជីវកម្មបដិសណ្ឋារកិច្ច មានសណ្ឋាគារ/ភោជនីយដ្ឋាន ជាដើម។
ស្របជាមួយការកត់សម្គាល់លើភាពរីកចម្រើនពីសំណាក់លោក ឯកអគ្គរដ្ឋទូត លោក ទេសរដ្ឋមន្ត្រី ស៊ុន ចាន់ថុល បានជម្រាបអំពីគម្រោងអភិវឌ្ឍន៍ថ្មីៗ ដែលបាន និងកំពុងអនុវត្ត ដើម្បីលើកកម្ពស់ ការតភ្ជាប់វិស័យហេដ្ឋារចនាសម្ព័ន្ធដឹកជញ្ជូន ឱ្យមានភាពប្រទាក់ក្រឡាពាសពេញផ្ទៃប្រទេស ក្នុងនោះរួមមាន៖ ការរៀបចំផែនការមេភស្តុភារកម្ម គម្រោងអភិវឌ្ឍន៍មជ្ឈមណ្ឌលភស្តុភារកម្មពហុបំណងភ្នំពេញ គម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ គម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ គម្រោងផ្លូវល្បឿនលឿន និងគម្រោងលើកកម្រិតផ្លូវរថភ្លើង ភ្នំពេញ-ប៉ោយប៉ែត ឱ្យទៅជាផ្លូវរថភ្លើងល្បឿនលឿនជាដើម។
លោកបន្តថា ទាក់ទងនឹងការបន្តជំរុញលើកទឹកចិត្តការប្រើប្រាស់រថយន្តអគ្គិសនី រាជរដ្ឋាភិបាលបានអនុញ្ញាតឱ្យក្រសួងសាធារណការ និងដឹកជញ្ជូន ដឹកនាំបង្កើតក្រុមការងារពិសេសអន្តរក្រសួង ដើម្បីរៀបចំតាក់តែងសេចក្តីព្រាងច្បាប់ពាក់ព័ន្ធនឹងរថយន្តអគ្គិសនី ដើម្បីជំរុញលើកទឹកចិត្តឱ្យមានការប្រើប្រាស់កាន់តែទូលំទូលាយ ដោយកាលពីថ្ងៃទី២៤ ខែមីនា កន្លងទៅ លោក រដ្ឋមន្ត្រី បានអញ្ជើញជាអធិបតីក្នុងការដឹកនាំកិច្ចប្រជុំដំបូងនៃគណៈកម្មាធិការបច្ចេកទេសអន្តរក្រសួងដើម្បីតាក់តែងលិខិតបទដ្ឋានគតិយុត្ត គោលនយោបាយ និងយុទ្ធសាស្រ្តជាតិសម្រាប់គ្រប់គ្រង និងអភិវឌ្ឍយានយន្តអគ្គិសនីផងដែរ។
គួររម្លឹកដែរថា កិច្ចសហប្រតិបត្តិការ និងទំនាក់ទំនងដ៏ល្អកន្លងមករវាងប្រទេសទាំងពីរ នៅតែមានជាបន្តបន្ទាប់ ជាពិសេសចំពោះជំនួយនានាពាក់ព័ន្ធនឹងការងាររៀបចំស្តង់ដារបច្ចេកទេសផ្លូវថ្នល់ ការងារគ្រប់គ្រងប្រព័ន្ធចម្រោះទឹកកខ្វក់ និងការរៀបចំយុទ្ធសាស្ត្រថ្នាក់ជាតិលើការគ្រប់គ្រងសំណល់រាវ ដែលរដ្ឋាភិបាលអូស្ត្រាលីបានផ្តល់មកកម្ពុជាជាហូរហែតាមរយៈ កម្មវិធីភាពជាដៃគូដើម្បីហេដ្ឋារចនាសម្ព័ន្ធ (P4I)។
កម្មវិធីនេះក៏ផ្តល់ជំនួយទៅដល់ការបង្កើតភាពជាដៃគូថ្មីៗ រវាងស្ថាប័នរដ្ឋ ដែលពាក់ព័ន្ធនឹងកិច្ចការហេដ្ឋារចនាសម្ព័ន្ធរបស់កម្ពុជា និងអូស្ត្រាលី ដើម្បីចែករំលែកចំណេះដឹង និងពង្រឹងទំនាក់ទំនងកាន់តែស៊ីជម្រៅរវាងប្រជាជននៃប្រទេសទាំងពីរ៕