ភ្នំពេញ ៖ លោក ហ៊ុន ម៉ាណែត បេក្ខភាពនាយករដ្ឋមន្ត្រីបន្តវេននាពេលអនាគត បានលើកឡើងថា អ្នកណាក៏ដោយ មិនថាជាជំនួយការ ដើរជាមួយលោករាល់ថ្ងៃក្តី ឲ្យតែយកឈ្មោះ និងរូបថតជាមួយលោក ទៅកាងធ្វើខុសច្បាប់ អាជ្ញាធរចាប់ខ្លួនចុះ មិនចាំបាច់សួរយោបល់ទេ ។
ក្នុងវិដេអូជិត២នាទី បង្ហោះលើបណ្ដាញសង្គមហ្វេសប៊ុក នៅថ្ងៃទី២៧ មីនា លោកបណ្ឌិត ហ៊ុន ម៉ាណែត បានបញ្ជាក់យ៉ាងច្បាស់ៗថា ទោះបីជាជំនួយការដែលដើរជាមួយលោករាល់ថ្ងៃក្តី បើធ្វើខុសច្បាប់ អាជ្ញាធរចាប់ចុះ ហើយបើអ្នកយកឈ្មោះលោកប្រើខុសច្បាប់ លោកនឹងប្តឹងបន្ថែមទៀត ។
លោកបណ្ឌិតថ្លែងថា «ពីណាដែលយកឈ្មោះខ្ញុំ ជាជំនួយការខ្ញុំ ស្អីក៏ដោយ ឲ្យតែធ្វើខុសច្បាប់ចាប់ទៅមិនបាច់ទទួលយោបល់ទេ ហើយប្រាប់មកខ្ញុំ ខ្ញុំប្តឹងថែមទៀត ព្រោះទី១អ្នកឯងធ្វើខុសច្បាប់ អាជ្ញាធរប្តឹង តែខ្ញុំនឹងប្តឹងរឿងយកឈ្មោះខ្ញុំទៅប្រើ។ អ្នកបានរូបថតមួយប៉ុស្តិ៍មកជាមួយខ្ញុំ ដើរទៅធ្វើបាបគេ ខ្ញុំថតសែលហ្វី ជាមួយរាប់រយរាប់ពាន់នាក់ អ្នកខ្លះអីចឹង។ ថ្ងៃមុនគេមកសួរខ្ញុំថា បងមានម្នាក់ថតរូបជាមួយបងឯង ទៅគៀបគេនៅកំពង់សោមថាជាជំនួយការផ្ទាល់បងឯង ហើយបងឯងឲ្យជាបេសកជនពិសេសចុះទៅចាប់ដី…ចាប់ទៅ ចាប់មិនបាច់សួរទេ ជំនួយការខ្ញុំក៏ដោយ ដើរជាមួយខ្ញុំរាល់ថ្ងៃក៏ដោយឲ្យតែធ្វើខុសចាប់ទៅ និយាយឲ្យច្បាស់»។
លោកបន្តថា «អ្នកខ្លះសុទ្ធថាជំនួយការគៀក ជំនួយការស្អិត ជំនួយការផ្ទាល់ ជំនួយការពិសេស អ្នកដែលគេថាឲ្យខ្ញុំថាជាជំនួយការពិសេស បេសកកម្មពិសេសចុះទៅយកដីខ្ញុំអត់ទាំងចាំថាថតពេលណាផង បេសកជនចាប់ដី ខ្ញុំថាមិនបាច់សួរទេឲ្យតែអ្នកខុសចាប់ទៅ ធ្វើតាមច្បាប់ទៅ ហើយប្រាប់ខ្ញុំស្រួលទៀត ខ្ញុំនឹងប្តឹងបន្តទៀត អីចឹងបើថ្ងៃក្រោយអាជ្ញាធរគេដកពាក្យបណ្តឹងក៏នៅជាប់ពាក្យបណ្តឹងរបស់ខ្ញុំដែរ ព្រោះធ្វើឲ្យខូចឈ្មោះ ខំចង់ងាប់រកតែពេលជួបប្រពន្ធកូនពុំបាន មកសន្សំបុណ្យបានតិចៗ ស្រាប់តែគេយកមកកំពប់ចោលទាំងអស់» ៕