មន្ត្រីជាន់ខ្ពស់រដ្ឋាភិបាលអ៊ុយក្រែនបានិយាយកាលពីថ្ងៃទី១៣ កុម្ភៈ ម្សិលមិញនេះថា រដ្ឋាភិបាលខ្លួននៅមិនទាន់ពិចារណាក្នុងការបិទជើងហោះចូលប្រទេសខ្លួននោះទេ បើទោះបីភាពតានតឹងរវាងអ៊ុយក្រែន និងរុស្ស៊ី នៅមិនទាន់បានធូរស្រាលក៏ដោយចុះ ស្របពេលដែលអាមេរិកព្រមានថា ទាហានរុស្ស៊ីអាចឈ្លានពានប្រទេសអឺរ៉ុបមួយនេះនៅពេលណាក៏បាន។
ទីក្រុងវ៉ាស៊ីនតោនបាននិយាយថា យោធារុស្ស៊ីដែលមានជាង១០ម៉ឺននាក់បានប្រមូលផ្តុំនៅជិតអ៊ុយក្រែន ហើយអាចឈ្លានពានចូលអ៊ុយក្រែននៅពេលណាក៏បាន។ តែយ៉ាងណាមិញ ទីក្រុងមូស្គូបានបដិសេធថាមិនមានផែនការបែបនេះទេ ហើយការលើកឡើងបែបនេះថាជា “រឿងភ័យស្លន់ស្លោ”។
ក្រុមហ៊ុនអាកាសចរណ៍ហូឡង់ KLM បាននិយាយកាលពីថ្ងៃសៅរ៍ថា ខ្លួននឹងបញ្ឈប់ការហោះហើរទៅកាន់ប្រទេសអ៊ុយក្រែនភ្លាមៗ ខណៈដែលក្រុមហ៊ុនអាកាសចរណ៍ SkyUp របស់អ៊ុយក្រែនបាននិយាយកាលពីថ្ងៃអាទិត្យថា ខ្លួនត្រូវបង្វែរយន្តហោះរបស់ខ្លួន បន្ទាប់ពីម្ចាស់យន្តហោះជួលបានរារាំងការហោះហើរមិនឱ្យចូលដែនអាកាសអ៊ុយក្រែន។
ដោយឡែកលោក Mykhailo Podolyak ទីប្រឹក្សានៃខុទ្ទកាល័យប្រធានាធិបតីអ៊ុយក្រែនបាននិយាយថា “ចំណុចសំខាន់បំផុតគឺថាអ៊ុយក្រែនខ្លួនឯងមើលមិនឃើញចំណុចណាមួយក្នុងការបិទមេឃ។ នេះគឺជាការសមហេតុសមផល។ លោក ថា ប្រសិនបើក្រុមហ៊ុនអាកាសចរណ៍សម្រេចចិត្តកំណត់កាលវិភាគហោះហើរឡើងវិញ នេះប្រាកដជាមិនមានជាប់ពាក់ព័ន្ធជាមួយការសម្រេចចិត្ត ឬគោលនយោបាយរបស់រដ្ឋរបស់លោកនោះទេ។
ពាក់ព័ន្ធនឹងការប្រឈមមុខគ្នារវាងអ៊ុយក្រែន និងរុស្ស៊ីនេះ អាមេរិក សម្ព័ន្ធមិត្តលោកខាងលិច និងប្រទេសផ្សេងទៀត បាននិងកំពុងជម្លៀសបុគ្គលិកស្ថានទូត និងបានណែនាំពលរដ្ឋរបស់ពួកគេកុំឱ្យធ្វើដំណើរទៅកាន់ប្រទេសអ៊ុយក្រែន ចំពេលមានការប្រឈមមុខដាក់គ្នានេះ។
គួរជម្រាបជូនថា ក្រុមប្រឹក្សាសន្តិសុខអង្គការសហប្រជាជាតិ សម្រេចបើកកិច្ចប្រជុំកាលពីថ្ងៃទី៣១ ខែមករា ឆ្នាំ២០២២ ដែលជាលើកដំបូងចាប់តាំងពីផ្ទុះភាពតានតឹងរវាងអ៊ុយក្រែន និងរុស្ស៊ីកាន់តែឡើងកម្តៅខ្លាំងដោយសារតែមហាអំណាចនៅអឺរ៉ុបមួយនេះគូសផែនទីប៉ុនប៉ងវាយលុកលុយអ៊ុយក្រែន នៅក្រោមក្រសែភ្នែករបស់យោធាណាតូ (NATO) ដែលព្រមានប្រឆាំងយ៉ាងខ្លាំងលើទង្វើរបស់ក្រុងមូស្គូ៕
