ភ្នំពេញ៖ កម្មវិធីប្រណាំងរទេះគោក្របីនឹងត្រូវរៀបចំនៅបរិវេណអង្គរឃ្យុងយូ ក្នុងអំឡុងពេលព្រឹត្តិការណ៍អង្គរសង្ក្រាន្តខេត្តសៀមរាប ដែលនឹងប្រព្រឹត្តិទៅនៅខែមេសា ឆ្នាំ ២០២៣ ។ នេះ បើតាមគណៈកម្មការរៀបចំព្រឹត្តិការណ៍អង្គរសង្ក្រាន្តកម្ពុជា ។
កម្មវិធីប្រណាំងរទេះគោក្របីជាកម្មវិធីមួយនៃព្រឹត្តិការណ៍អង្គរសង្ក្រាន្ដ សំដៅដល់ការរំលឹកឡើងវិញអំពីវប្បធម៌ប្រពៃណីខ្មែរក្នុងការប្រណាំងរទេះគោ ក្របី ដើម្បីយល់ដឹងអំពីសារៈសំខាន់របស់វិស័យកសិកម្មក្នុងជីវភាពរស់នៅរបស់ប្រជាជនកម្ពុជា ព្រមទាំងជំរុញឱ្យមានទឹកចិត្តស្រលាញ់ និងថែរក្សាបរិស្ថានក្នុងសន្តានចិត្តរបស់ប្រជាជនកម្ពុជា។
កម្មវិធីនេះនឹងរៀបចំឱ្យមានការប្រណាំងរទេះគោ ក្របី នៅតំបន់អង្គរឃុ្យងយូ ដើម្បីរួមចំណែកផ្តល់នូវភាពសប្បាយរីករាយ និងការទស្សនាការប្រណាំងយ៉ាងជក់ចិត្តដិតអារម្មណ៍ ដល់សំណាក់មហាជនដែលបានអញ្ជើញចូលរួមទស្សនាក្នុងកម្មវិធីនេះ។ មិនត្រឹមតែប៉ុណ្ណោះ ក៏មានរៀបចំនូវចំបើងយក្ស និងរទេះសម្រាប់ថតរូបទៀតផង។ កម្មវិធីប្រណាំងរទេះគោ ក្របី នឹងរៀបចំឡើងនៅបរិវេណអង្គរឃ្យុងយូ៕
