តាកែវ៖ ប្រជាពលរដ្ឋ២ រូបមាន ឈ្មោះ ហ៊ឹត សុខា និងឈ្មោះ លុយ សុភាវីបានប្រទះឃើញវត្ថុបុរាណ ដែលជាអង្រែកិនថ្នាំបុរាណ នៅព្រឹកថ្ងៃ ១២ខែកុម្ភៈ ឆ្នាំ២០២៣ ស្ថិតនៅការដ្ឋានសាងសង់ផ្ទះត្រចៀកកាំស្ថិតនៅភូមិមានាគ ឃុំរមេញ ស្រុកកោះអណ្តែត ខេត្តតាកែវ។
វត្ថុបុរាណ ដែលជាអង្រែកិនថ្នាំបុរាណ មានពណ៌ប្រផេះ ធ្វើពីថ្មភក់ មានទំហំ/កម្ពស់ ៣៣ សង់ទីម៉ែត្រ ទទឹង ៩សង់ទីម៉ែត្រ បណ្តោយ ៨សង់ទីម៉ែត្រ និងទម្ងន់ ៣.៧គីទ្បូក្រាម មាន រចនាបថមុនសម័យអង្គរ។
បន្ទាប់មក ពួកគាត់បានយកមកប្រគល់ជូនរដ្ឋបាលស្រុកកោះអណ្តែត នាព្រឹកថ្ងៃទី១៣ ខែកុម្ភៈ ឆ្នាំ២០២៣ ដើម្បីរង់ចាំសមត្ថកិច្ចជំនាញខេត្តចុះមកទទួលបន្តនិងយកមករក្សាទុកនៅសារមន្ទីរខេត្តតាកែវ ទុកជាមត៌កវប្បធម៌រូបីនៃជាតិ។
លុះនៅថ្ងៃទី ១៥ ខែកុម្ភៈ ឆ្នាំ ២០២៣ នេះ លោកអភិបាល និងអភិបាលរងស្រុកកោះអណ្តែត ដោយមានការចូលរួមពីប៉ួលីសបេតិកភណ្ឌខេត្ត លោកនាយផ្នែក មន្តី្រការិយាល័យសង្គមកិច្ចនិងសុខុមាលភាពសង្គមស្រុក មេឃុំ និងមេភូមិ នេះបានប្រគល់ឱ្យក្រុមការងារបេតិកភណ្ឌនិងសារមន្ទីរខេត្ត នៃមន្ទីរវប្បធម៌និងវិចិត្រសិល្បៈ ខេត្តតាកែវ ដើម្បីរក្សាទុក៕
<<កិច្ចការពារសម្បត្តិបេតិកភណ្ឌវប្បធម៌ជាតិ ជាកាតព្វកិច្ចរបស់ប្រជាពលរដ្ឋគ្រប់រូប>>
