ភ្នំពេញ ៖ រថយន្តដឹកហ្គាសមួយគ្រឿងបើកលឿនជ្រុលទៅបុកម៉ូតូហុងដាឌ្រីម កំពុងជិះបត់ឆ្លងផ្លូវ បណ្តាលឲ្យរងរបួសម្នាក់ហើយរថយន្តបួងចង្កូតឡើងសួនទ្រូងផ្លូវ ធ្លាយទៅបំណែកផ្លូវម្ខាងទៀត បែកកង់ក្រោយ កាលពីវេលាម៉ោង៩និង២០នាទីព្រឹក ថ្ងៃទី២៣ ខែមិថុនា ឆ្នាំ២០២៣ នៅតាមផ្លូវជាតិលេខ៣ មុខឃ្លាំងឱសថរបស់ក្រសួងសុខាភិបាល ភូមិព្រៃព្រីងត្បូង២ សង្កាត់ចោមចៅ៣ ខណ្ឌពោធិសែនជ័យ។
តាមប្រភពនៅកន្លែងបានឲ្យដឹងថា មុនកើតហេតុ ម៉ូតូម៉ាកហុងដាឌ្រីម ពណ៌ខ្មៅ សេរី២០២១ ពណ៌ខ្មៅ ពាក់ស្លាកលេខ បាត់ដំបង 1AO-6297 ជិះដោយបុរសម្នាក់ ពីត្បូងទៅជើង ដល់ចំណុចកើតហេតុ បត់ឆ្លងផ្លូវត្រឡប់ក្រោយ ស្រាប់តែរថយន្តកូរ៉េ ដឹកហ្គាស ម៉ាកហុីយ៉ាន់ដាយ ពណ៌ខៀវ ស ពាក់ស្លាកលេខ ភ្នំពេញ 2P-2870 បើកលឿនពីជើងទៅត្បូង ជ្រុលបុកបណ្តាលឲ្យរងរបួសម្នាក់ ម៉ូតូបាក់ដាច់កង់មុខ ហើយរថយន្តរេចង្កូតឡើងសួនទ្រូងផ្លូវ ធ្លាយទៅបំណែកផ្លូវម្ខាងទៀត បែកកង់ក្រោយខាងស្តាំ នៅកាត់ទទឹងផ្លូវ។
ក្រោយកើតហេតុជនរងគ្រោះម្នាក់ ហៅម៉ូតូកង់បីជិះទៅពេទ្យដោយខ្លួនឯង ចំណែកម៉ូតូនិងរថយន្ត សមត្ថកិច្ចមូលដ្ឋានចុះទៅពិនិត្យរួច ប្រគល់ឲ្យការិយាល័យចរាចរជើងគោក ស្នងការក្រុងភ្នំពេញ យកទៅរក្សាទុករងចាំដោះស្រាយពេលក្រោយ៕
