ភ្នំពេញ៖ ឧកញ៉ា ស្រី ចាន់ថន បានសម្រេច បង្កើតក្លឹបអន្តរជាតិមួយ មានឈ្មោះថា «គុនខ្មែរជើងឯកពិភពលោក (Kun Khmer World Champion) និង បង្កើតខ្សែរក្រវ៉ាត់កម្រិតពិភពលោកមួយទៀត ក្នុងគោលបំណងលើកស្ទួយវិស័យគុនខ្មែរ ឱ្យល្បីរន្ទឹលើឆាកអន្តរជាតិ។
ឧកញ៉ា ស្រី ចាន់ថន បានសរសេរនៅលើទំព័រហ្វេសបុករបស់ខ្លួនៅថ្ងៃទី ១៧ ខែមីនា ឆ្នាំ ២០២៣ នេះ ថា «ថ្ងៃនេះខ្ញុំសូមជម្រាបបងប្អូនជនរួមជាតិផងដែរថា ក្លឹបកីឡាគុនខ្មែរលំដាប់អន្តរជាតិរបស់យើងបានរត់ឯកសារតាំងពីភូមិ ឃុំ ស្រុក ខេត្ត ប្រធានមន្ទីរ អប់រំ យុវជន និងកីឡា នឹង សហព័ន្ធកីឡាគុនខ្មែររួចរាល់ហើយ»។
លោកបន្តថា « ដូច្នេះក្នុងពេលដ៏ឆាប់ខាងមុខនេះ ក្លឹបគុនខ្មែររបស់យើងនឹងលេចរូបរាងហើយ។ មូលហេតុដែលខ្ញុំសម្រេចចិត្តដាក់ឈ្មោះនេះក៏ដោយសារតែខ្ញុំចង់ឲ្យកីឡាគុនខ្មែររបស់យើងក្លាយទៅជាកីឡាកម្រិតពិភពលោក»។
លោកបន្ថែមថា «ដោយក្លឹបរបស់យើងនឹងនាំកីឡាករបរទេសជុំវិញពិភពលោកមកប្រកួតនៅក្នុងប្រទេសរបស់យើងក៏ដូចជានាំកីឡាកររបស់ខ្មែរយើងទៅប្រកួតនៅក្រៅប្រទេសផងដែរ។ លើសពីនេះទៅទៀត ខ្ញុំបានបង្កើតខ្សែរក្រវ៉ាត់កម្រិតពិភពលោកមួយទៀតដែលបានរួមបញ្ជូលនៅរចនាបថខ្មែរដ៏ល្អឯករួមមាន៖ យ័ន្តប្រាំបីទិស នាគក្បាលប្រាំពីរ ផ្ការំដួល និងចម្លាក់រូបប្រដាល់ក្បាច់គុនល្បុក្កតោខ្មែរ និងចំបាប់។ តើបងប្អូនមានយោបល់បែបណាដែរចំពោះរចនាបថខ្សែរក្រវ៉ាត់អន្តរជាតិមួយនេះ?»៕
