ភ្នំពេញ៖ តបតាមការអញ្ជើញរបស់គណៈកម្មាធិការជាតិរៀបចំការបោះឆ្នោត (គ.ជ.ប) នៃសាធារណរដ្ឋកូរ៉េ គ.ជ.ប នៃព្រះរាជាណាចក្រកម្ពុជា បានចាត់តាំងមន្រ្តី គ.ជ.ប ចំនួន ១៥រូប ចូលរួមវេទិកាអន្តរជាតិ ក្រុងសេអ៊ូល ឆ្នាំ២០២២ ស្ដីពីការបោះឆ្នោត តាមរយៈកម្មវិធីវីដេអូសន្និសីទពីចម្ងាយ (Zoom) នៅរសៀលថ្ងៃទី១០ ខែវិច្ឆិកា ឆ្នាំ២០២២។
តាមសេចក្តីប្រកាសព័ត៌មានរបស់របស់គជប នៅថ្ងៃទី ១១ ខែវិច្ឆិកានេះ បញ្ជាក់ថា នេះជាវេទិកាប្រចាំឆ្នាំខួបទី៧ ក្រោមមូលបទ “លទ្ធិប្រជាធិបតេយ្យ៖ ការឆ្លើយតបទៅនឹងការប្រែប្រួលបរិយាកាសនៃការបោះឆ្នោត” ដែលមានប្រធានបទចំនួន ២ រួមមាន៖ការឆ្លើយតបទៅនឹងការប្រែប្រួលបរិយាកាសនៃការបោះឆ្នោត បង្កឡើងដោយសារ ការអភិវឌ្ឍនៃបច្ចេកវិទ្យាឌីជីថល និង បញ្ហាប្រឈមក្នុងការលើកកម្ពស់ការចូលរួមរបស់យុវជនក្នុងវិស័យនយោបាយ។
លោក សោម សូរីដា អគ្គលេខាធិការរង គជប បានកត់សម្គាល់ក្រោយបញ្ចប់វេទិកាអន្តរជាតិនេះថា វេទិកានេះ កំពុងដើរស្របគ្នាទៅនឹងការធ្វើទំនើបកម្មនៃដំណើរការរៀបចំការបោះឆ្នោតនៅកម្ពុជា ដែលរៀបចំឡើងដោយ គ.ជ.ប ឈរលើមូលដ្ឋាននៃការរីកចម្រើនបច្ចេកវិទ្យាព័ត៌មានវិទ្យា ដែលបានដាក់ឱ្យប្រើប្រាស់ជាផ្លូវការជាបន្តបន្ទាប់ ចាប់តាំងពីឆ្នាំ២០១៦ មក។
លោកបន្តថា ការធ្វើទំនើបកម្មដោយប្រព័ន្ធកុំព្យូទ័រ ទាំងនោះ រួមមាន កម្មវិធីគ្រប់គ្រងការចុះឈ្មោះបោះឆ្នោតកម្មវិធីគ្រប់គ្រងការចុះបញ្ជីបេក្ខជននៃគណបក្សនយោបាយ កម្មវិធីចេញឯកសារបញ្ជាក់អត្តសញ្ញាណបម្រើឱ្យការបោះឆ្នោត និង កម្មវិធីត្រួតពិនិត្យ ផ្ទៀងផ្ទាត់ និងបូកសរុបលទ្ធផលនៃការបោះឆ្នោត។
លោក បានគូសបញ្ជាក់ថា សម្រាប់ឆ្នាំ២០២៣ ខាងមុខនេះ គ.ជ.ប នឹងដាក់ឱ្យដំណើរការកម្មវិធីចំនួន ២ ទៀត គឺកម្មវិធីគ្រប់គ្រងស្ថិតិប្រជាពលរដ្ឋដែលមានសិទ្ធិបោះឆ្នោត និងកម្មវិធីគ្រប់គ្រងការងារបណ្ដឹង ព័ត៌មាន និងការងារសន្តិសុខបោះឆ្នោតដោយប្រព័ន្ធកុំព្យូទ័រ។
លោក សោម សូរីដា ជឿជាក់ថា វេទិការអន្តរជាតិក្រុងសេអ៊ូល ស្ដីពីការបោះឆ្នោត ឆ្នាំនេះ នឹងផ្ដល់នូវបទពិសោធន៍ល្អៗដល់ គ.ជ.ប នៃព្រះរាជាណាចក្រកម្ពុជា ដើម្បីកែលម្អការធ្វើទំនើបកម្មដំណើរការរៀបចំការបោះឆ្នោតរបស់ខ្លួនឱ្យកាន់តែប្រសើរថែមទៀត។
តាមរយៈវេទិកាអន្តរជាតិនេះ ក៏ដូចជាការផ្លាស់ប្ដូរបទពិសោធន៍ជាមួយសហគមន៍អន្តរជាតិពាក់ព័ន្ធនឹងការបោះឆ្នោតដទៃទៀត គ.ជ.ប បានទទួលធាតុចូលថ្មីៗបន្ថែម សម្រាប់ការរៀបចំការបោះឆ្នោតដោយសេរីត្រឹមត្រូវ និង យុត្តិធម៌ ស្របតាមគោលការណ៍ប្រជាធិបតេយ្យ សេរីពហុបក្សនៅកម្ពុជា៕ ដោយ៖ ពុទ្ធិពល
