ភ្នំពេញ៖ កម្លាំងផ្នែកប្រឆាំងគ្រឿងញៀន នៃអធិការដ្ឋាននគរបាលខណ្ឌសែនសុខ កាលថ្ងៃទី០៩ ខែតុលា ឆ្នាំ២០២៣ វេលាម៉ោង១៧:១០នាទីល្ងាច បានធ្វើការបង្រ្កាបករណីជួញដូរដោយខុសច្បាប់ នូវសារធាតុញៀន នៅចំណុចផ្ទះគ្មានលេខ ផ្លូវវាលខ្សាច់បឹងឈូក ភូមិបូរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ និងឃាត់ខ្លួនជនសង្ស័យចំនួន ០២នាក់។
ជនសង្ស័យទាំងនោះ មាន ១. ឈ្មោះ សៀង សំណាង ហៅក្រៅ ភ័ក្រ ភេទប្រុស អាយុ ២៧ឆ្នាំ ជនជាតិខ្មែរ។ និង ២. ឈ្មោះ អៀង សេងជា ហៅក្រៅ អាម៉ាប់ជី ភេទប្រុស អាយុ ២៨ឆ្នាំ ជនជាតិខ្មែរ។
ក្រោយឃាត់ខ្លួន សមត្ថកិច្ច បានដកហូតសម្ភារៈរួមមាន៖ ក្រាមពណ៌សថ្លា ចំនួន០២កញ្ចប់ថង់ (០១កញ្ចប់ថងធំ និង០១កញ្ចប់ថង់តូច), ទូរស័ព្ទដៃចំនួន០៣គ្រឿង (ម៉ាក vivo ចំនួន០១គ្រឿង, ម៉ាក អិនចុចពិល ចំនួន០២គ្រឿង)។
ក្រោយពីឃាត់ខ្លួនជនសង្ស័យខាងលើ កម្លាំងបន្ដស្រាវជ្រាវ ឈានដល់ឃាត់ខ្លួនជនសង្ស័យចំនួន០២នាក់បន្ថែមទៀត នៅចំណុចផ្ទះជួលលេខ៥៥៨B ផ្លូវលេខ៦៣Sony ភូមិឬស្សីទី១ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។ ជនសង្ស័យទាំងនេះ រួមមាន ១. ឈ្មោះ ងួន ណាវ៉ុន ហៅក្រៅ អាវ័ន្ដ ភេទប្រុស អាយុ ៤០ឆ្នាំ ជនជាតិខ្មែរ។ និង ២. ឈ្មោះ ឃុន កវី ភេទប្រុស អាយុ ៤២ឆ្នាំ ជនជាតិខ្មែរ ។
សមត្ថកិច្ច បានដកហូតសម្ភារៈរួមមាន ក្រាមពណ៌សថ្លា ចំនួន០៣កញ្ចប់ថង់ (០២កញ្ចប់ថង់ធំ, ០១កញ្ចប់ថង់តូច), ម្សៅម៉ដ្ថពណ៌សថ្លាចំនួន០១ កូនកញ្ចប់ថង់, ជញ្ជីងសំរាប់ថ្លឹងសារធាតុញៀនចំនួន០១គ្រឿង, ឧបករណ៍សម្រាប់ប្រើប្រាស់សារធាតុញៀន (ដបទឹក) ចំនួន០២ដប និងដែកកេះចំនួន០២។
បច្ចុប្បន្នជនសង្ស័យ កំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធីច្បាប់៕