ព្រះវិហារ៖ មន្ទីរសុខាភិបាលនៃរដ្ឋបាលខេត្តព្រះវិហារសូមធ្វើការអំពាវនាវដល់សាធារណជនទាំងអស់សូមកុំពិសារឬបរិភោគ រុក្ខជាតិ ឬ សត្វ ល្អិតដែលយើងមិនស្គាល់ ឬមិនដែលធ្លាប់បានបរិភោគពីមុនមកព្រោះវាអាចបណ្តាលអោយប៉ះពាល់ដល់ សុខភាពរបស់លោកអ្នកយ៉ាងធ្ងន់ធ្ងរ និង អាចបណ្ដាលអោយបាត់បង់អាយុជីវិត។ នេះបើតាមសេចក្តីជូនដំណឹងនៅថ្ងៃទី១០ ខែសីហា ឆ្នាំ២០២៣។
សេចក្តីជូនដំណឹងនេះ បញ្ជាក់ថា ជាក់ស្ដែងកាលពីថ្ងៃទី០៤ ខែសីហា ឆ្នាំ ២០២៣ មានប្រជាពលរដ្ឋ ០២ នាក់ ប្តីប្រពន្ធ រស់នៅក្នុងភូមិស្រអែមត្បូង ឃុំ កន្ទួត ស្រុក ជាំក្សាន្ត ខេត្ត ព្រះវិហារ បានសង្ស័យពុលចំណីអាហារ ដោយពួកគាត់ទាំងពីរនាក់ បានបរិភោគ(សត្វកំភេម ខ្មោច) ដោយបុរសជាប្តីបរិភោគកំភេមខ្មោចចំនួន ០៣ ក្បាល និង ស្ត្រីជាប្រពន្ធបានបរិភោគកំភេមខ្មោច ចំនួន ០៥ ក្បាល។
ប្រភពដដែលបន្ថែមថា បន្ទាប់ពីពួកគាត់ទាំងពីរនាក់បានបរិភោគរួចប្រមាណ ១០ នាទី ពួកគាត់មានអាការៈ រមាស់ ក្អួតចង្អោរ និង មានពងបែកក្នុងមាត់ ។ ទោះបីពួកគាត់ត្រូវបានខិតខំព្យាបាលដោយក្រុមគ្រូពេទ្យ យ៉ាងណាក៏ដោយក៏ពួកគាត់ទាំងពីរនាក់បានបាត់បង់អាយុជីវិតដែរ។ ដោយស្ត្រីជាប្រពន្ធបានស្លាប់កាលពី ថ្ងៃទី ០៥ ខែ សីហា ឆ្នាំ ២០២៣ និង បុរសជាប្ដីបានស្លាប់នៅថ្ងៃទី ០៦ ខែ សីហា ឆ្នាំ២០២៣។
កន្លងមក មន្ទីរសុខាភិបាលក៏បានសង្កេតឃើញប្រជាពលរដ្ឋមួយចំនួនបានរងគ្រោះថ្នាក់ដោយបរិភោគរុក្ខជាតិដូចជាផ្សិត ឬ ក៏សត្វល្អិតដែលបណ្ដាលអោយពុលអ្នកខ្លះអាចជួយសង្គ្រោះបាន និង អ្នកខ្លះទៀតមិនអាចជួយសង្គ្រោះបាន៕
