ភ្នំពេញ ៖ ដោយសារមានកិច្ចខិតខំរបស់មន្រ្តីជាន់ខ្ពស់កម្ពុជាបានបញ្ជាក់ពីភាពស្អាតស្អំរបស់ខ្លួន អង្គការហ្វាត (FATF) មានមូលដ្ឋានបារាំង បានសម្រេចដកកម្ពុជា ចេញពីបញ្ជីប្រផេះហើយ។ នេះបើតាមសម្ដេច ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ។
FATF ដែលមានមូលដ្ឋាននៅទីក្រុងប៉ារីស ប្រទេសបារាំង កាលពីប៉ុន្មានឆ្នាំមុន បានសម្រេចដាក់កម្ពុជាក្នុង «បញ្ជីប្រផេះ» នៃក្រុមប្រទេសមានហានិភ័យខាងអំពើលាងលុយកខ្វក់ដែលពិភពលោកត្រូវបង្កើនការតាមដាន ហើយបន្ទាប់មកទៀត កាលពីថ្ងៃទី៤ ខែមីនា ឆ្នាំ២០២២ អង្គការអន្តរជាតិមួយនេះក៏បានបន្តសម្រេចដាក់កម្ពុជាក្នុង«បញ្ជីប្រផេះ»ទៀត ។
ក្នុងឱកាសអញ្ជើញ បើកសន្និបាតត្រួតពិនិត្យលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងមហាផ្ទៃ នាថ្ងៃទី២២ ខែកុម្ភៈ ឆ្នាំ២០២៣ សម្ដេច ស ខេង មានប្រសាសន៍ថា «តាមរបាយការណ៍របស់ ឯកឧត្តម កើត រិទ្ធ រដ្ឋមន្ដ្រីក្រសួងយុត្តិធម៌ បានឲ្យដឹងថា មហាសន្និបាត នៃអង្គការ FATF កាលពីថ្ងៃទី២១ ដែលកិច្ចប្រជុំត្រៀមបំរុង សម្រាប់ថ្ងៃទី២៤ នោះ គឺបានសម្រេចដកកម្ពុជា ចេញពីបញ្ជីប្រផេះ។ ប៉ុន្ដែប្រកាសជាផ្លូវការ តាមព័ត៌មាន គេនឹងធ្វើម៉ោង១០ (ម៉ោងនៅកម្ពុជា) នៅថ្ងៃទី២៣ ខែមីនា ឆ្នាំ២០២៣ យើងរងចាំព័ត៌មាននេះទាំងអស់គ្នា»។
រដ្ឋមន្រ្តីមហាផ្ទៃបន្តថា ដំណឹងនេះពិតជាល្អសម្រាប់កម្ពុជាហើយ ប៉ុន្តែស្របពេលជាមួយនឹងអ្វីដែលទទួលនេះ ក៏មិនត្រូវភ្លេចខ្លួនផងដែរ ក្នុងការបន្តការពារកម្ពុជាក្នុងកិច្ចសហការជាមួយអង្គការ FATF ៕ ដោយ៖ រិន ចំរើន