កណ្តាល៖ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងថា “ឃ្លាំងលើកដាក់ និងស្តុកទំនិញត្រជាក់” ជាសមិទ្ធផលថ្មីមួយបន្ថែមទៀត ក្នុងវិស័យភស្តុភារកម្ម និងកំពង់ផែ ដែលនឹងជួយបំពេញបន្ថែមនូវមុខងាររបស់ចំណតផែកុងតឺន័រ LM17 ដែលនឹងធ្វើឱ្យកំពង់ផែស្វយ័តភ្នំពេញទទួលបាននូវកំណើនបរិមាណកុងតឺន័រឆ្លងកាត់ ដោយឃ្លាំងនេះ នឹងផ្តល់នូវតម្លៃសេវាបន្ថែម ជាពិសេស សេវាស្តុកទំនិញត្រជាក់ ស្របតាមស្តង់ដារអន្តរជាតិ។
លោក ប៉េង ពោធិ៍នា បានលើកឡើងបែបនេះក្នុងពិធីសម្ពោធដាក់ឱ្យប្រើប្រាស់ជាផ្លូវការ ឃ្លាំងលើកដាក់ និងស្តុកទំនិញត្រជាក់ របស់ក្រុមហ៊ុន ខ្មែរ ខូល ឆេន (Khmer Cold Chain) ដែលមានទីតាំងស្ថិតនៅក្នុងបរិវេណចំណតផែកុងតឺន័រ LM17 របស់កំពង់ផែស្វយ័តភ្នំពេញ ក្នុងភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាលនៅថ្ងៃទី ២៤ ខែមករា ឆ្នាំ ២០២៤ ។
ជាងនេះទៅទៀត លោក ប៉េង ពោធិ៍នា បន្ថែមថា ឃ្លាំងនេះនឹងចូលរួមគាំទ្រផែនការអាទិភាព របស់ក្រសួងសាធារណការ និង ដឹកជញ្ជូន ដែលបានដាក់ចេញដើម្បីពង្រឹង និងលើកកម្ពស់ការអភិវឌ្ឍវិស័យឡូជីស្ទីក និងកំពង់ ផែនៅកម្ពុជា រួមទាំងការធ្វើកំណែទម្រង់ធ្វើយ៉ាងណាឱ្យតម្លៃឡូជីស្ទីក កាន់តែមានភាពប្រកួត ប្រជែង និងការផ្តល់សេវាកាន់តែមានភាពឆាប់រហ័ស្ថ តម្លាភាព និងប្រសិទ្ធភាព ។
លោក សង្កត់ធ្ងន់ទៀតថា កិច្ចខិតខំប្រឹងប្រែង និងសមិទ្ធផលដែលសម្រេចបានទាំងនេះ បាននិងកំពុងឆ្លើយតបទៅនឹងចក្ខុវិស័យ របស់ក្រសួង កម្មវិធីនយោបាយនិងយុទ្ធសាស្ត្ររបស់រាជរដ្ឋាភិបាល ជាពិសេសស្របទៅនឹង ទិសដៅក្នុងការអភិវឌ្ឍវិស័យឡូជីស្ទីក និងកំពង់ផែនៅកម្ពុជា។
បន្ថែមពីនេះ លោក រដ្ឋមន្ត្រី បានយកឱកាសនេះថ្លែងអំណរគុណចំពោះកំពង់ផែស្វយ័តភ្នំពេញ ក៏ដូចជាក្រុមហ៊ុន Khmer Cold Chain និងក្រុមហ៊ុន InfraCo Asia ដែលសហការគ្នាបាន យ៉ាងល្អប្រសើរក្នុងការសម្រេចនូវសមិទ្ធផលឃ្លាំងលើកដាក់ និងស្តុកទំនិញត្រជាក់នេះឡើង និងបានស្នើឱ្យក្រុមហ៊ុនបន្តសហការបន្ថែមទៀតជាមួយកំពង់ផែស្វយ័តភ្នំពេញ ដើម្បីធ្វើឱ្យ ប្រសើរឡើងនូវការផ្តល់សេវាប្រកបដោយគុណភាព ដល់បណ្តាក្រុមហ៊ុនដែលមានតម្រូវការ ប្រើប្រាស់ឃ្លាំងត្រជាក់នេះ។
លោករដ្ឋមន្ត្រី ក៏បានស្នើដល់ ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយក ក.ស.ភ និងថ្នាក់ដឹកនាំ ព្រមទាំងមន្ត្រី កម្មករ និយោជិតទាងអស់ បន្តយកចិត្តទុកដាក់បំពេញការងារឱ្យបានកាន់តែល្អប្រសើរ ប្រកបដោយស្មារតីទទួលខុសត្រូវ ជាពិសេសបន្តការដឹកនាំ គ្រប់គ្រង និងអភិវឌ្ឍកំពង់ផែ ចំណតផែ និង ឃ្លាំងស្តុកទំនិញ ឱ្យបានខ្លាំងក្លាថែមទៀត ដើម្បីធានាបាននូវប្រតិបត្តិការសេវាកម្មស្របតាម តម្រូវការរបស់អតិថិជន។
ឃ្លាំងលើកដាក់ និងស្តុកទំនិញត្រជាក់ ដែលប្រារព្ធពិធីសម្ពោធដាក់ឱ្យប្រើប្រាស់ជាផ្លូវការនាឱកាសនេះកើតឡើងក្រោមគំនិតផ្តួចផ្តើមអភិវឌ្ឍន៍ដោយក្រុមហ៊ុន InfraCo Asia សហការជាមួយកំពង់ផែស្វយ័តភ្នំពេញ ដោយមានការគាំទ្រពីមូលនិធិអភិវឌ្ឍន៍ និង USAID ក្រោមជំនួយឧបត្ថម្ភពី ប្រទេសអង់គ្លេស អូស្ត្រាលី ស្វីស និងហូឡង់។ ឃ្លាំងនេះមានសមត្ថភាពស្តុកទំនិញបាន ៥ ៨២៧ម៉ែត្រគូប ជាមួយនឹងកម្រិតសីតុណ្ហភាពចាប់ពី -២២°C ដល់ ១៥°C។
ពិធីសម្ពោធនៅថ្ងៃទី ២៤ ខែមករា ឆ្នាំ ២០២៤ មានការអញ្ជើញចូលរួមពី ឯកអគ្គរាជទូតចក្រភពអង់គ្លេសប្រចាំកម្ពុជា ឯកអគ្គរដ្ឋទូតអូស្ត្រាលីប្រចាំកម្ពុជា អនុប្រធានស្ថានទូតសហរដ្ឋអាមេរិកប្រចាំកម្ពុជា ប្រធានការិយាល័យសហប្រតិបត្តិការអន្តរជាតិ នៃស្ថានអគ្គកុងស៊ុលប្រទេសស្វីសប្រចាំកម្ពុជា អគ្គនាយិកាក្រុមហ៊ុន InfraCo Asia ប្រធានក្រុមប្រឹក្សាភិបាល និងជាអគ្គនាយកក្រុមហ៊ុន Khmer Cold Chain ភិបាលរងនៃគណៈអភិបាលខេត្តកណ្តាល ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកកំពង់ផែស្វយ័តភ្នំពេញ លោក លោកស្រី ភ្ញៀវកិត្តិយសជាតិ/អន្តរជាតិ និងបងប្អូនបុគ្គលិក កម្មករ និយោជិត ជាច្រើនរូបផ្សេងទៀត៕
