កណ្តាល៖ គិតមកដល់ថ្ងៃទី ៦ ខែមករា ឆ្នាំ ២០២៣ វឌ្ឍនភាពនៃការងារសាងសង់សំណង់ការពារច្រាំងទន្លេបាសាក់បរិវេណបង្គោលព្រំដែនលេខ២៤៥/៤(១) ប្រវែង១២០០ម៉ែត្រ ស្ថិតនៅក្នុងភូមិសាស្ត្រសង្កាត់ព្រែកជ្រៃ ស្រុកកោះធំ ខេត្តកណ្តាល សម្រេចបានប្រមាណ ៦២%។ នេះ បើតាមក្រសួងធនធានទឹក និងឧតុនិយម នៅថ្ងៃទី៦ ខែមករា ឆ្នាំ ២០២៤។
បើតាមក្រសួងធនធានទឹក ក្នុងនោះរួមមាន៖ ទី១)ការងាររៀបបាវការពារចរន្តទឹកបុក ហូរច្រោះដីផ្នែកខាងក្រោមសម្រេចបាន១០០% ទី២)ការងារបុកស្ពានផាយសម្រេចបាន ១០០% ទី៣)ការងារបុកស៊ីផាយសម្រេចបាន ៥០% ទី៤)ការងារបេតុងអាមេសម្រេចបាន ១៥% និងទី៥)ការងារបំពេញដីសម្រេចបាន ៥%។ តាមគម្រោងការងារនេះនឹងបញ្ចប់ក្នុងដំណាច់ខែសីហា ឆ្នាំ២០២៤ ខាងមុខ។
ដើម្បីជំរុញការងារនេះ ឱ្យសម្រេចតាមផែនការ លោកថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អមដំណើរដោយ ថ្នាក់ដឹកនាំ មន្ត្រីជំនាញបច្ចេកទេសក្រសួង និងមន្ទីរធនធានទឹក និងឧតុនិយមខេត្តកណ្តាល បាន ចុះពិនិត្យវឌ្ឍនភាព នៃគម្រោងនេះ នៅថ្ងៃទី ៦ ខែមករា ឆ្នាំ ២០២៤ ។
ក្នុងឱកាសនោះ លោក រដ្ឋមន្ត្រីបានថ្លែងនូវការកោតសរសើរ និងវាយតម្លៃខ្ពស់ចំពោះវឌ្ឍនភាពការងារដែលសម្រេចបាន និងបានណែនាំបន្ថែមដល់លោកប្រធានមន្ទីរ និងក្រុមការងារបច្ចេកទេសឱ្យបន្តនូវកិច្ចសហការល្អជាមួយអាជ្ញាធរដែនដី និងភាគីពាក់ព័ន្ធទាំងអស់ ដើម្បីអាចសម្រេចកិច្ចការការពារច្រាំងទន្លេបាសាក់នេះតាមផែនការដែលបានគ្រោងទុកប្រកបដោយគុណភាពខ្ពស់។
ជាមួយគ្នានេះ លោក រដ្ឋមន្ត្រីក៏បានណែនាំឱ្យក្រុមការងារបច្ចេកទេស នៃនាយកដ្ឋានជលសាស្ត្រ និងការងារទន្លេ សិក្សាច្រាំងទន្លេបាសាក់នេះនៅផ្នែកខាងក្រោមការដ្ឋានដែលមានប្រវែងប្រមាណ ៣០០០ម៉ែត្រ គួរមានការសាងសង់បន្ត ដើម្បីទប់ស្កាត់ការហូរច្រោះនៃច្រាំងទន្លេបន្ថែមទៀត។
គួរបញ្ជាក់ថា ច្រាំងទន្លេបាសាក់បរិវេណបង្គោលព្រំដែនលេខ២៤៥/៤(១) ត្រូវបានហូរច្រោះដោយចរន្តទឹកទន្លេបាសាក់ហូរបុក ជាដំណោះស្រាយបន្ទាន់ ក្រសួងធនធានទឹក និងឧតុនិយមបានធ្វើការការពារបណ្តោះអាសន្នក្នុងប្រវែង ១៥០ម៉ែត្រ ក្នុងកំឡុងខែសីហា ឆ្នាំ២០១៩។
ជាបន្ត ក្រុមការងារបច្ចេកទេសនៃនាយកដ្ឋានជលសាស្ត្រ និងការងារទន្លេបានធ្វើការសិក្សាបច្ចេកទេសលំអិតបន្ថែមរហូតដល់ខែមេសា ឆ្នាំ២០២៣ កន្លងមកនេះ និងបានបន្តសាងសង់សំណង់ច្រាំងទន្លេបាសាក់ បរិវេណបង្គោលព្រំដែនលេខ២៤៥/៤(១) ស្ថិតក្នុងភូមិសាស្ត្រសង្កាត់ព្រែកជ្រៃ ស្រុកកោះធំ ខេត្តកណ្តាលនេះ ប្រវែង ១២០០ម៉ែត្រ ជាសំណង់រឹងតែម្តង៕