នាយករដ្ឋមន្ត្រីអង់គ្លេស លោក បូរីស ចនសុន បាននិយាយកាលពីថ្ងៃសៅរ៍ថា ប្រសិនបើប្រទេសលោកខាងលិច មិនបានបំពេញតាមការសន្យារបស់ខ្លួន ក្នុងការគាំទ្រឯករាជ្យភាពរបស់អ៊ុយក្រែននោះទេ, លោកថា វានឹងមានផលវិបាកដ៏អាក្រក់នៅទូទាំងពិភពលោក ក្នុងនោះក៏មានតៃវ៉ាន់ផងដែរ។ នេះបើយោងតាមការចុះផ្សាយរបស់ទីភ្នាក់ងាសារព័ត៌មានរ៉យទ័រកាលពីថ្ងៃទី១៩ កុម្ភៈម្សិលមិញនេះ។
ការលើកឡើងរបស់នាយករដ្ឋមន្ត្រីអង់គ្លេសបែបនេះ គឺធ្វើឡើងស្របពេលដែលកងទ័ពរុស្សីបានបង្កើនចំនួនកាន់តែច្រើនៗនៅជិតព្រំដែនអ៊ុយក្រែន។ ទន្ទឹមនឹងគ្នានេះ ប្រធានាធិបតីរុស្ស៊ី វ្ល៉ាឌីមៀ ពូទីន បានចាប់ផ្តើមធ្វើសមយុទ្ធដោយកងកម្លាំងកាំជ្រួចនុយក្លេអ៊ែរជាយុទ្ធសាស្ត្រ បើទោះបីជារុស្ស៊ីបានច្រានចោលការបារម្ភរបស់លោកខាងលិចដែលថា ខ្លួនត្រៀមនឹងវាយលុកអ៊ុយក្រែនក៏ដោយចុះ។
សម្រាប់លោក បូរីស ចនសុន “យើងមិនដឹងច្បាស់ពីអ្វីដែលលោកប្រធានាធិបតីពូទីនមានបំណងទេ ប៉ុន្តែវាប្រផ្នូលគឺអាក្រក់ណាស់”។ លោក សង្កត់ធ្ងន់ថា “ប្រសិនបើអ៊ុយក្រែនមានគ្រោះថ្នាក់ ភាពតក់ស្លុតនឹងបន្ទរជុំវិញពិភពលោក។ ហើយការបន្ទរទាំងនោះនឹងត្រូវឮនៅអាស៊ីខាងកើត នឹងត្រូវបានឮតៃវ៉ាន់” ។
លោក បានបន្ថែមថា “មនុស្សនឹងទាញការសន្និដ្ឋានថាការឈ្លានពានបានត្រូវអនុញ្ញាត ហើយនោះប្រហែលជាត្រឹមត្រូវ”។
សូមជម្រាបជូនថា ប្រទេសចិនចាត់ទុកកោះតៃវ៉ាន់ជាផ្នែកនៃទឹកដីរបស់ខ្លួន ហើយមិនបានច្រានចោលការប្រើកម្លាំងដើម្បីគ្រប់គ្រងកោះនេះឡើងវិញ ដែលគ្រប់គ្រងដោយខ្លួនឯងតាំងពីឆ្នាំ ១៩៤៩៕
