ភ្នំពេញ៖ យុវជនរៀនថ្នាក់ទី៩ម្នាក់ ត្រូវរថយន្តរបស់ក្រុមហ៊ុនខារ៉ាបាវបុកកិនបែកក្បាលស្លាប់ភ្លាមៗ ខណ:ពេលកំពុងធ្វើដំណើរចេញពីផ្ទះទៅសាលារៀន។ គ្រោះថ្នាក់ចរាចរណ៍ដ៏គួរឲ្យរន្ធត់ខាងលើនេះបានកើតឡើងកាលពីវេលាម៉ោង១២:១៥នាទីរសៀល ថ្ងៃទី១៣ ខែកក្កដា ឆ្នាំ២០២៣ ស្ថិតនៅផ្លូវបេតុងច្រកចូលផ្សារឯករាជ្យ២ សង្កាត់ចោមចៅ៣ ខណ្ឌពោធិសែនជ័យ រាជធានីភ្នំពេញ។
ជនរងគ្រោះខាងលើនេះមានឈ្មោះ មុំ ម៉ាជូលី ភេទប្រុស អាយុ១៧ឆ្នាំ មុខរបរសិស្សថ្នាក់ទី៩ នៃវិទ្យាល័យចំណេះដឹងទូទៅនិងបច្ចេកទេស ហ៊ុន សែន ជម្ពូវ័ន ស្នាក់នៅម្តុំទីតាំងកើតហេតុខាងលើ។
បើតាមប្រភពពីកន្លែងកើតហេតុឲ្យដឹងថា មុនពេលកើតហេតុរងគ្រោះខាងលើបានជិះម៉ូតូមួយគ្រឿងម៉ាកស្គុបពីព៍ណក្រហមពាក់ស្លាកលេខភ្នំពេញ1CM-4237 ធ្វើដំណើរចេញពីផ្ទះបម្រុងទៅសាលារៀនជម្ពូវ័ន ក្នុងទិសដៅពីជើងទៅត្បូង លុះដល់ចំនុចកើតហេតុត្រូវបានរថយន្តក្រុមហ៊ុនខារ៉ាបាវពាក់ស្លាកលេខភ្នំពេញ3G-2632 បើកបរដោយបុរសម្នាក់ក្នុងទិសដៅស្របគ្នាបានរេចង្កូតបុករួចកិនជនរងគ្រោះខាងលើបណ្តាលឲ្យបែកក្បាលស្លាប់ភ្លាមៗនៅកន្លែងកើតហេតុ។ ភ្លាមៗនោះប្រជាពលរដ្ឋបានជួយនាំគ្នាដេញស្ទាក់ចាប់អ្នកបើកបរនិងរថយន្តប្រគល់ទៅឲ្យសមត្ថកិច្ចចាត់ការតាមនិតិវិធី។
ក្រោយពេលកើតហេតុ សមត្ថកិច្ចខណ្ឌពោធិសែនជ័យសហការជាមួយកម្លាំងជំនាញនគរបាលការិយាល័យជើងគោកនៃស្នងការដ្ឋាននគរបាលរាជធានីភ្នំពេញចុះមកធ្វើការវាស់វែងនិងធ្វើកំណត់ហេតុ ប្រគល់សពយុវជនរងគ្រោះខាងលើទៅឲ្យក្រុមគ្រួសារចាត់ចែងធ្វើបុណ្យតាមប្រពៃណី៕