ភ្នំពេញ៖ យុវជន២នាក់កំពុងតែជិះម៉ូតូធ្វើដំណើរតាមផ្លូវក៍ត្រូវរថយន្តសាំងយ៉ុងមួយគ្រឿងបានបើកជ្រុលទៅបុកនិងម៉ូតូពីក្រោយបណ្ដាលឲ្យដួលអូសម៉ូតូនៅនិងផ្លូវ ហើយគាប់ជួនពេលនោះក៏ស្រាប់តែរថយន្តតូយ៉ូតាព្រុសមួយគ្រឿងទៀតដែលបើកបញ្ច្រាសទិសដៅគ្នាបានជ្រុលទៅបុកយុវជនម្នាក់ដែលអង្គុយនៅខាងក្រោយបណ្តាលអោយបែកក្បាលហូរឈាមស្លាប់ភ្លាមៗ។
ហេតុការណ៍នេះកើតឡើងនៅវេលាម៉ោង៧និង១៥នាទីយប់ ថ្ងៃទី២១ ខែមិថុនា ឆ្នាំ២០២៣ នៅចំណុច ច្រកចូលផ្សារក្រមួនផ្លូវ៦០ម៉ែត្រភូមិទួលរកា១ សង្កាត់ចាក់អង្រែក្រោម ខណ្ឌមានជ័យ។
ជនរងគ្រោះ២នាក់បានជិះម៉ូតូម៉ាកហុងដាប៊ិតពណ៌សលាយខៀវពាក់ស្លាកលេខភ្នំពេញ1IL4258 បានជិះធ្វើដំណើរតាមបណ្ដោយផ្លូវ៦០ម៉ែត្រក្នុងទិសដៅពីជើងទៅត្បូងខណៈមេឃកំពុងតែភ្លៀងខ្លាំង។
នៅពេលនោះមានរថយន្តប្រភេទសាំងយ៉ុងមិនចាំស្លាកលេខមួយគ្រឿងបានបើកធ្វើដំណើរក្នុងទិសដៅស្របគ្នាក៍ជ្រុលទៅបុកនិងម៉ូតូរបស់ជនរងគ្រោះពីក្រោយ បណ្តាលឲ្យដួលអូសម៉ូតូអូសទាំងមនុស្សរណូករណែលពេញផ្លូវហើយគាប់ជួនពេលនោះក៍ស្រាប់តែរថយន្តតូយ៉ូតាព្រុសមួយគ្រឿងទៀតមិនចាំស្លាកលេខដូចគ្នាបានបើកធ្វើដំណើរតាមផ្លូវ៦០ម៉ែត្រក្នុងទិសដៅបញ្ច្រាសទិសគ្នាចាប់់ហ្វ្រាំងមិនទាន់ក៍ជ្រុលទៅកិនជនរងគ្រោះម្នាក់ដែលជិះខាងក្រោយម៉ូតូបណ្តាលឲ្យបែកក្បាលហូរឈាមស្លាប់ភ្លាមៗ។
ក្រោយកើតហេតុភ្លាម រថយន្តបង្ករទាំង២គ្រឿងបានបើករត់គេចបាត់ស្រមោលអស់តែម្ដងទៅ។ នៅពេលនោះសមត្ថកិច្ចបានធ្វើលិខិតប្រគល់សពអោយសាច់ញាតិចាត់ចែងធ្វើបុណ្យតាមប្រពៃណីនៅវត្តចាក់អង្រែក្រោម ចំណែកម៉ូតូសមត្ថកិច្ចបានវាស់វែងយកទៅរក្សាទុកនៅអធិការដ្ឋាននគរបាលខណ្ឌមានជ័យ៕