ភ្នំពេញ៖ ពេលជិះម៉ូតូវ៉ាជែងជាមួយរថយន្ដ គេចម៉ូតូនៅពីមុខមួយគ្រឿងទៀត មិនទាន់ក៏ទាក់ដៃចង្កូតដួលបោកក្បាលស្លាប់នៅនឹងកន្លែងមា្នក់ និង របួសស្រាលម្នាក់នៅវេលាម៉ោង៨និង២៥នាទីព្រឹកថ្ងៃទី២០ ខែមិថុនា ឆ្នាំ ២០២៣នៅមុខ មជ្ឍមណ្ឌលអភិវឌ្ឍសង្គម ពោធិ៍សែនជ័យតាមបណ្តោយផ្លូវលេខ១៩៦២ ក្នុងសង្កាត់គោករកាខណ្ឌព្រែកព្នៅ រាជធានីភ្នំពេញ។
របាយការណ៍របស់សមត្ថកិច្ច ឱ្យដឹងថា សពជនរងគ្រោះមានឈ្មោះ ឆាយ ទូច ភេទប្រុស អាយុ៣២ ឆ្នាំជាជាងផ្សារដែក មានលំនៅភូមិ បឹងប៉ិច សង្កាត់ពន្សាំង ខណ្ឌព្រែកព្នៅ រាជធានីភ្នំពេញបានជិះម៉ូតូម៉ាកវេវ ពណ៌ខ្មៅ លាយក្រហម ពាក់ស្លាកលេខ១FX.៥៧៧២មួយគ្រឿងឌុបបងប្អូនជីដូនមួយម្នាក់។
បើតាមបងប្អូនជីដូនមួយ ឈ្មោះនួន រក្សា ភេទប្រុស ដែលជាជាងដែក រួមដំណើរជាមួយគ្នា បានអោយដឹងថា នៅមុនពេលកើតហេតុខ្លួនបានទិញស្រាថ្នាំ ផឹកម្នាក់១កែវ រួចក៍បានជិះម៉ូតូទៅធ្វើការនៅម្តុំពោធិចិនតុងដោយឈ្មោះទូចជាអ្នកឌុប។ នៅពេល មកដល់កន្លែងកើតហេតុ ក៍បានបើកម៉ូតូវ៉ាជែងរថយន្ត មួយគ្រឿងស្របទិសគ្នា ជ្រុលទៅទាក់ដៃចង្កូតជាមួយម៉ូតូ១គ្រឿងទៀត ដែលធ្វើដំណើរ ក្នុងទិសដៅបញ្ច្រាស់គ្នា បណ្តាលអោយដួលបោកក្បាលនៅលើថ្នល់បែកមួកនិងក្បាលពីក្រោយបណ្តាលអោយស្លាប់នៅកន្លែងហើយម៉ូតូម្ខាងទៀតពុំបានដួលនោះទេជិះទៅបាត់។
ប្រភពដដែលបន្ដទៀតថា ជនរងគ្រោះមានប្រពន្ធនឹងកូនប្រុស ស្រីតូចៗ ចំនួន៣នាក់ ហើយ ទើបតែ លែងលះគ្នាបានប្រមាណជាង១ខែ ក៍បានជួបគ្រោះអកុសលដួលម៉ូតូបោកក្បាលស្លាប់យ៉ាងអាណោចអាធ័មនៅលើដងផ្លូវ។ បច្ចុប្បន្នសពជនរងគ្រោះត្រូវបានសមត្ថកិច្ចមន្ត្រីជំនាញខណ្ឌព្រែកព្នៅបញ្ជូនទៅឲ្យក្រុមគ្រួសារយកទៅធ្វើបុណ្យតាមប្រពៃណី៕
