ភ្នំពេញ៖បុរស២នាក់បានស្លាប់ភ្លាមៗនិងស្ត្រីជិះកង់បីម្នាក់ទៀតរងរបួសធ្ងន់ក្នុងករណីគ្រោះថ្នាក់ចរាចរណ៍មួយកើតឡើងដ៏គួរឱ្យរន្ធត់មួយបង្កឡើងដោយរយន្តបែនដឹកដីមួយគ្រឿងដាច់ហ្វ្រាំងបុក កាលពីវេលាម៉ោង១១និង ០០នាទី ថ្ងៃទី ១៣ ខែមិថុនាឆ្នាំ២០២៣ ស្ថិតនៅតាមបណ្ដោយផ្លូវមហាវិថីឈ្នះឈ្នះ សង្កាត់ឃ្មួញ ខណ្ឌសែនសុខ រាជធានីភ្នំពេញ។
ប្រភពពីសមត្ថកិច្ច ឱ្យដឹងថា សពជនរងគ្រោះទាំងពីរនាក់ក្នុងហេតុការណ៍គ្រោះថ្នាក់ចរាចរាចរណ៍ខាងលើមានឈ្មោះ ទី១-ឡាត់ លុយ ភេទប្រុសអាយុ ៤៨ ឆ្នាំ មានស្រុកកំណើតនៅភូមិទឺងឆ្វេង ឃុំច្បារអំពៅេះស្រុកបាធាយ ខេត្តកំពង់ចាម។ និង ទី២- នឿន នាង ភេទប្រុស អាយុ៣៧ឆ្នាំ រស់នៅភូមិទឹងឆ្វេង ឃុំច្បារអំពៅ ស្រុកបាធាយ ខេត្តកំពង់ចាម។
ប្រភពដដែលបន្តថា មុនពេលកើតហេតុជនរងគ្រោះទាំងពីរនាក់ខាងលើ បានជូនកូនៗរបស់ពួកគាត់មកប្រឡងនៅសាលាកូរ៉េនៅម្ដុំទំនប់កប់ស្រូវ ខណៈកូនៗរបស់គាត់ប្រលងចប់សព្វគ្រប់ ហើយនោះ ពួកគាត់ក៏បាននាំគ្នាត្រឡប់ទៅស្រុកកំណើតវិញនៅឯខេត្តកំពង់ចាម ដោយជិះម៉ូតូមួយគ្រឿងម៉ាកហុងដាសេ១២៥ ស៊េរីឆ្នាំ ២០១៦ ពណ៌ខ្មៅពាក់ផ្លាកលេខ ភ្នំពេញ1FU-4563 ឌុបគ្នាចេញពីសាលាកូរ៉េក្នុងទិសដៅពីលិចទៅកើត លុះពេលមកដល់ចំណុចកើតហេតុក៏មានរថយន្តបែនដឹកដីមួយគ្រឿង ពាក់ផ្លាកលេខ ក្រុងព្រះសីហនុ3A-3378 បើកបរស្របទិសដៅគ្នាក្នុងល្បឿនយ៉ាងលឿន ដោយរថយន្តដាច់ប្រាំងហើយអ្នកបើកបរក៏បានស៊ីផ្លេ សុំផ្លូវដើម្បីឲ្យដំណឹងអ្នកនៅខាងមុខផងដែរ តែដោយសារអ្នកជិះម៉ូតូគាត់មិនដឹងថារថយន្តខាងលើដាច់ហ្រ្វាំងទើបបណ្ដាលឲ្យរថយន្តបែនដីខាងលើនេះបុករះអ្នកជិះម៉ូតូនិងម៉ូតូកង់បីបណ្ដាលឱ្យស្លាប់ពីរនាក់ភ្លាមៗនិងស្ត្រីដែលកំពុងជិះនៅលើម៉ូតូកង់បីម្នាក់រងរបួសធ្ងន់ត្រូវបានបញ្ជូនទៅកាន់មន្ទីរពេទ្យដើម្បីធ្វើការសង្គ្រោះភ្លាមៗផងដែរ។
ចំណែកអ្នកបើកបររថយន្តបង្ក សមត្ថកិច្ចនគរបាលប៉ុស្តិ៍ឃ្មួញ បានឃាត់ខ្លួននិងប្រគល់ទៅឲ្យការិយាល័យចរាចរណ៍ជើងគោកចាត់ការតាមនីតិធី។ ក្រោយពេលកើតហេតុសមត្ថកិច្ចនគរបាលចរាចរណ៍ខណ្ឌសែនសុខសហការជាមួយនឹងកម្លាំងជំនាញនគរបាលចរាចរណ៍ក្រុង បានចុះមកធ្វើការវាស់វែង និងបានយកម៉ូតូជនរងគ្រោះនិងរថយន្តបង្កទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញដើម្បីដោះស្រាយគ្នាតាមផ្លូវច្បាប់នៅពេលក្រោយ។
ចំណែកសពជនរងគ្រោះទាំងពីរនាក់ខាងលើសមត្ថកិច្ចបានធ្វើកំណត់ហេតុប្រគល់ទៅឲ្យក្រុមគ្រួសារសាច់ញាតិដឹកយកទៅធ្វើបុណ្យតាមប្រពៃណីនៅឯខេត្តកំពង់ចាម៕