ខេត្តកោះកុង ៖ នៅថ្ងៃទី២៩ ខែឧសភា ឆ្នាំ២០២៣ វេលាម៉ោង១ និង៣០នាទីរំលងអធ្រាត្រ មានករណីគ្រោះថ្នាក់ចរាចរណ៍រវាងរថយន្ត និងម៉ូតូ បញ្ច្រាសទិសគ្នា បណ្តាលឲ្យមនុស្សម្នាក់ស្លាប់ នៅចំណុចភូមិពាមកាយ ឃុំកោះស្ដេច ស្រុកគីរីសាគរ ខេត្តកោះកុង ។
មន្រ្តីនគរបាលស្រុកគីរីសាគរ បានឲ្យដឹងថា រថយន្តបង្កម៉ាកព្រុស ពណ៌បៃតងខ្ចី ពាក់ស្លាកលេខភ្នំពេញ 2BT-9380 អ្នកបើកបរឈ្មោះ YANGCHANGBO ភេទប្រុស អាយុ៣៣ឆ្នាំ ជនជាតិចិន បានបុកនឹងម៉ូតូម៉ាកហុងដាសេ១២៥ ពណ៍ខ្មៅ ផលិតឆ្នាំ២០២២ ពាក់ស្លាកលេខតាកែវ 1AA-9028 អ្នកបើកបរឈ្មោះ រៀង កេត ភេទប្រុស អាយុ២៦ឆ្នាំ ជនជាតិខ្មែរ មានទីលំនៅភូមិស្ដៅ ឃុំពេជ្រផ្សារ ស្រុកកោះអណ្ដែត ខេត្តតាកែវ មុខរបរកម្មករសំណង់ (ស្លាប់) ។
បច្ចុប្បន្នសពត្រូវបានក្រុមគ្រួសារយកទៅធ្វើបុណ្យតាមប្រពៃណី ចំណែកម៉ូតូ និងរថយន្តយកទៅរក្សាទុកនៅអធិការដ្ឋាន៕
