ភ្នំពេញ ៖ សម្តេច ហ៊ុន សែន នាយករដ្ឋមន្រ្តីកម្ពុជា សង្ឃឹមថា តុលាការ និងសមត្ថកិច្ច នឹងចេះធ្វើការចំពោះករណី លោក យឹម ស៊ីណន់ និង លោក ហ៊ុន កុសល ដែលបាននិយាយក្នុងលក្ខណៈប្រមាថទៅលើអង្គព្រះមហាក្សត្រ ។ លោកទាំង២នាក់នេះ ដែលជាមនុស្សស្និតនឹងលោក កឹម សុខា បានលើកឡើងក្នុងន័យស្រដៀងគ្នាអំពីការប្រមាថទៅព្រះមហាក្សត្រ ចំពោះការបាំងឆត្រ(ក្លុ)លើអង្គព្រះមហាក្សត្រក្នុងព្រះរាជពិធីប្រោសប្រទានព្រះអគ្គិជ័យកីឡា នាថ្ងៃ២១ មីនា ក្នុងប្រាសាទអង្គរវត្ត។
សម្តេច ហ៊ុន សែន បានឲ្យដឹងក្នុងពិធីចែកសញ្ញាបត្រដល់និស្សិតនៃវិទ្យាស្ថានវ៉ាន់ដា នាថ្ងៃ២២ មីនា ថា សម្តេចប្រុងបញ្ចេញសារអំពីបុគ្គលទាំង២គឺ យឹម ស៊ីណន់ និង ហ៊ុន កុសល តាំងពីយប់មិញម្ល៉េះ តែសម្តេចបញ្ចេញនាព្រឹកនេះតែម្តង ។ ចំពោះករណីនេះ សម្តេចថា ក៏បាននាំយុវជន២នាក់នេះមកសួរនាំអំពីការប្រមាថព្រះមហាក្សត្រ។
សម្តេចថា មិនមែនសម្តេចនិយាយដើម្បីឲ្យតុលាការអនុវត្តទោសលើពួកគេនោះទេ តែសម្តេចលើកឡើងនេះ ដើម្បីចង់បកស្រាយឲ្យពលរដ្ឋខ្មែរបានដឹង ព្រោះអ្នកទាំង២ដែលនិយាយដល់អង្គព្រះមហាក្សត្រនេះមិនមែនជាការបញ្ចេញមតិនោះទេ គឺជាការប្រមាថហើយ ដូច្នេះសង្ឃឹមថា តុលាការ និងសមត្ថកិច្ចចេះដោះស្រាយហើយ។
លោក យឹម ស៊ីណន បានបង្ហោះនៅលើហ្វេសប៊ុករបស់លោកថា «បើតាមសំឡេងពលរដ្ឋតាមហាង កាហ្វេគឺថ្ងៃនេះយើងអាច ឃើញច្បាស់ថានរណាជាស្តេចផែនដីពិតប្រាកដ»។
ចំណែកលោក ហ៊ុន កុសល វិញបង្ហោះដែរថា «ឃើញពួកគេធ្វើបាបព្រះទ័យនឹងបន្ទាបព្រះចេស្តាព្រះមហាក្សត្រ ខ្មែរគ្រប់ច្រកបែបនេះ។ទូលបង្គំជាអ្នកនយោបាយជំនាន់ក្រោយប្តេជ្ញានឹងបើសមត្ថភាពដែលមានទាំងប៉ុន្មានចូលរួមពូនផ្តុំជាមួយលោកប្រធាន កឹម សុខា ការពារព្រះចេស្ដាក្សត្រ និងព្រះរាជបល្ល័ង្កដែលប្រជារាស្ត្រខ្មែរមិនអាចខ្វះបាន»។
ក្រោយឃើញបែបនេះ សម្តេចបានខំមិនតបទៅលោក យឹម ស៊ីណន ថា ការបង្ហោះពាក់ព័ន្ធលើបញ្ហានេះ ជារឿងបំភ្លៃ។ សម្តេចបានបញ្ជាក់ថា៖ «មានតែព្រះមហាក្សត្រទេដែលព្រះអង្គដឹងច្បាស់»។ សម្តេចក៏បានឆ្លើយឆ្លងបន្ថែមទៀតថា៖ «បើគ្មានទោសទើបចម្លែកព្រោះ នេះមិនមែនជា របៀបបញ្ចេញមតិទេតែជាការបំភ្លៃការពិតមួយដោយចេតនា។ ទោះយ៉ាងណាយើងទុកជូនតុលាការជាអ្នកកាត់ក្តី»៕