ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានរៀបចំដាក់លក់ផលិតផលបន្លែខ្មែរជាច្រើនមុខ នៅខាងមុខទីស្តីការក្រសួងស្ថិតនៅក្នុងខណ្ឌចំការមន រាជធានីភ្នំពេញ ដើម្បីអបអរថ្ងៃ១៤កុម្ភៈ ដែលត្រូវបានគេស្គាល់ជាទូទៅថាជាថ្ងៃទិវានៃក្តីស្រលាញ់។
ក្រសួងកសិកម្មបញ្ជាក់ថា ផលិតផលខ្មែរជាច្រើនមុខកំពុងដាក់តាំងលក់ពិសេសបន្លែសុវត្ថិភាព អង្ករបាយឆ្ងាញ់ និងស្រាផ្លែឈើរសជាតិស្រទន់ ដែលបានវេចខ្ចប់យ៉ាងស្អាតសម្រាប់ជាកាដូថ្ងៃដ៏ពិសេសនេះ ដោយមានស្តង់ជាច្រើន ដូចជាសាកលវិទ្យាល័យភូមិន្ទកសិកម្ម និងមាសបៃតងជាដើម។
ម្ចាស់ស្តង់មួយកន្លែងដែលកំពុងដាក់លក់បានលើកឡើងថា “ថ្ងៃនេះជាថ្ងៃនៃក្តីស្រលាញ់ យើងបានយកផលិតផលសុវត្ថិភាពមកដាក់លក់ចែកជូនបងប្អូនអ្នកទទួលទានដើម្បីសុខភាពល្អ គឺយើងធ្វើការផ្សារភ្ជាប់ក្តីស្រលាញ់ និងសុខភាព” “ស្រលាញ់គ្រួសារ ពិសាអាហារសុវត្ថិភាព”។
បើតាមក្រសួង ផលិតផលដែលតាំងលក់គឺផលិតផលស្រស់មានប្រមាណជាង ២០មុខ ហើយរបស់កែច្នៃមានប្រមាណជិត ២០មុខ ដែលជាផលិតផលសុវត្ថិភាព ល្អសម្រាប់សុខភាព ដោយមិនមានសារធាតុគីមីឡើយ។
សម្រាប់អតិថិជនវិញ បានបង្ហាញពីអារម្មណ៍រំភើបរីករាយដែលក្រសួងផ្តើមរៀបចំឱ្យមានការតាំងលក់បន្លែសុវត្ថិភាពនៅទីនេះ “ខ្ញុំមកទិញបន្លែ គឺដោយសារខ្ញុំស្រលាញ់បន្លែ និងស្រលាញ់អ្នកដែលខ្ញុំទិញបន្លែទៅឱ្យ”៕ ដោយ៖ ពុទ្ធិពល
