ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ដ្រី កម្ពុជា បានលើកឡើងថា ការរីកចម្រើនរបស់កម្ពុជា មិនអាចកាត់ផ្តាច់ចេញពីការជួយឧបត្ថម្ភគាំទ្រពីបារាំងបានឡើយ។
ក្នុងសន្និសីទព័ត៌មានរួមគ្នាជាមួយ លោក អេម៉ានុយអែល ម៉ាក្រុង ប្រធានាធិបតីបារាំង នាថ្ងៃ១៤ ធ្នូ សម្តេចតេជោបានមានប្រសាសន៍ថា កម្ពុជា-បារាំង ពិតជាមានទំនាក់ទំនង តាំងពីយូរលង់ណាស់មកហើយ។សម្តេចក៏បានថ្លែងអំណរគុណបារាំង បានចូលរួមចំណែកយ៉ាងសំខាន់ ក្នុងដំណើរការកសាងសន្តិភាព និងអភិវឌ្ឍរបស់កម្ពុជា រហូតដល់ពេលបច្ចុប្បន្ន។
សម្ដេចតេជោបន្តថា «ការរីកចម្រើនរបស់កម្ពុជា មិនអាចកាត់ផ្តាច់ ចេញពីការជួយឧបត្ថម្ភទាំងឡាយរបស់បារាំងបានទេ»។
ជាមួយគ្នានេះ សម្តេចក៏បានថ្លែងអំណរគុណបារាំង បានទទួលប្រជាពលរដ្ឋខ្មែររត់ភៀសខ្លួនពីសង្គ្រាម និងពីរបបប្រល័យពូជសាសន៍ប៉ុលពត មករស់នៅដោយសុខស្រួល៕
ដោយ៖ រិន ចំរើន
