កំពង់ស្ពឺ៖ ក្រោយទទួលបានបណ្ដឹងជាបន្ដបន្ទាប់ពីសំណាក់អ្នកដំណេីរ ជនរងគ្រោះ និងតំណាងក្រុមហ៊ុនផ្លូវល្បឿនលឿន កម្លាំងអធិការដ្ឋាននគរបាលស្រុកសំរោងទង បានបេីកប្រតិបត្ដិការស្រាវជ្រាវរកមុខសញ្ញាដែលតែងតែបង្កអសន្ដិសុខ គប់ បាញ់កញ្ចក់រថយន្ដ។
ដោយបានការចង្អុលណែនាំដ៏ខ្ពង់ខ្ពស់ពីលោក សម សាមួន ស្នងការនគរបាលខេត្ដកំពង់ស្ពឺ កកម្លាំងជំនាញដឹកនាំដោយលោក ឃុត សុផល អធិការនគរបាលស្រុកសំរោងទង បានសហការជាមួយកម្លាំងនគរបាលប្រចាំការលេីផ្លូវល្បឿនលឿន ស្រាវជ្រាវតាមវិធានជំនាញឃាត់ខ្លួនបានមុខសញ្ញាម្នាក់ ចំណោមបក្ខពួកផ្សេងទៀតរត់គេចខ្លួន។
ជាក់ស្ដែងមុខសញ្ញាដែលសមត្ថកិច្ចឃាត់ខ្លួនបានកាលពីថ្ងៃទី០២ ខែកក្កដា ឆ្នាំ២០២៣ វេលាម៉ោង ១៤និង៣០នាទី ឈ្មោះ ឈឿម ដែន ហៅ ខ្មៅ ភេទប្រុស អាយុ ៣៣ឆ្នាំ ស្នាក់នៅភូមិអូក្រាំងអំបិល ឃុំត្រពាំងគង ស្រុកសំរោងទង បានសារភាពនិងបញ្ជាក់ថា ខ្លួននិងបក្ខពួកបានធ្វេីសកម្មភាពយកចំពាមកៅស៊ូគ្រាប់ថ្មបាញ់កញ្ចក់រថយន្ត ដែលធ្វេីដំណេីរឆ្លងកាត់លេីផ្លូវល្បឿនលឿន ម្ដុំអូរក្រាំងអំបិលនិងផ្លូវជាតិលេខ៤ ភូមិស្លា។
តាមចម្លេីយបន្ថែមការធ្វេីសកម្មភាពមិនរេីសប្រភេទរថយន្ដ និងពេលវេលាទេ អោយតែខ្លួននិងបក្ខពួក ចេញមកពីកន្លែងដែលស្នាក់នៅបណ្ដោះអាសន្ន (ប្រេីប្រាស់គ្រឿងញៀន) កន្លងមកខ្លួនបានយកជំពាមដាក់គ្រាប់ថ្ម បាញ់ទៅលេីឡានជាច្រេីនតែមិនដឹងថាចំឬបែកកញ្ចក់ឬកំពិតនោះទេ តែការបាញ់គប់កញ្ចក់រថយន្ដមិនមែនមានតែខ្លួនទេ គឺមានបក្ខពួកផ្សេងទៀត។
ឈ្មោះ ឈឿម ដែន បានសារភាពថា ករណីបាញ់កញ្ចក់រថយន្តដោយប្រើជំពាមកៅស៊ូ គឺពេលខ្លះមានប្រសិទ្ធភាពពេលខ្លះ មិនបានផលនោះទេ ។ ក្រៅពីខ្លួននៅមានបក្ខពួកម្នាក់ពីទៀតធ្វើសកម្មភាព សកម្ម ឈ្មោះ ខឹ……ន្លក ភេទប្រុស រស់នៅភូមិស្លា ឃុំវល្លិសរ ស្រុកសំរោងទង ខេត្តកំពង់ស្ពឺ (គេចខ្លួន) ។
ករណីនេះកម្លាំងនគរបាលជំនាញ កំពុងបន្តស្រាវជ្រាវ តាមចាប់ឈ្មោះ xxx បច្ចុប្បន្នសមត្ថកិច្ចនគរបាលនៃអធិការដ្ឋាននគរបាលស្រុកសំរោងទងបានកសាងសំណុំរឿង បញ្ជូនជនសង្ស័យអនុវត្ដតាមនីតិវិធី៕
