តាកែវ៖ លោក អ៊ូច ភា អភិបាលខេត្តតាកែវ បានចុះហត្ថលេខាលិខិតផ្ដួចផ្ដើមស្ដីពីការបង្កើតទំនាក់ទំនងមេត្រីភាពរវាងខេត្តតាកែវ នៃព្រះរាជាណាចក្រកម្ពុជា និងក្រុងវីហ្វាង នៃសាធារណរដ្ឋប្រជាមានិតចិន ដើម្បីផ្តល់ផលប្រយោជន៍ទៅវិញទៅមកក្នុងការធ្វើកិច្ចសហប្រតិបត្តិការចម្រុះច្រើនរូបភាពលើគ្រប់វិស័យ។
ពិធីចុះហត្ថលេខាខាងលើនេះ ត្រូវបានធ្វើឡើង នៅថ្ងៃទី១៤ ខែមិថុនា ឆ្នាំ២០២៣ និងត្រូវបានរៀបចំធ្វើឡើង នៅសាលាប្រជុំរដ្ឋបាលខេត្ត ដោយមានការអញ្ជើញចូលរួមដោយ លោក លោកស្រី អភិបាលរងខេត្ត លោក លោកស្រី ប្រធានមន្ទីរអង្គភាពជុំវិញខេត្ត និងមន្រ្តីពាក់ព័ន្ធជាច្រើនរូប។
នៅក្នុងលិខិតដែលបានចុះហត្ថលេខារបស់លោក អ៊ូច ភា ផ្តោតលើ៤ចំណុច សំខាន់ៗរួមមាន៖
១.ភាគីទាំងពីរឈរលើគោលការណ៍ស្មើភាពគ្នា និងផលប្រយោជន៍ទៅវិញទៅមកក្នុងការធ្វើកិច្ចសហប្រតិបត្តិការចម្រុះច្រើនរូបភាពលើគ្រប់វិស័យ រួមមាន៖ សេដ្ឋកិច្ច ពាណិជ្ជកម្ម វិទ្យាសាស្រ្ត វប្បធម៌ ទេចរណ៍ អប់រំកីឡា សុខាភិបាល និងការផ្លាស់ប្ដូរធនធានមនុស្ស ដើម្បីលើកម្ពស់នូវវិបុលភាព និងការអភិវឌ្ឍន៍រួម។
២.ចរន្តទំនាក់ទំនងរវាងអង្គភាពពាក់ព័ន្ធ និងថ្នាក់ដឹកនាំនៃភាគីទាំងពីរ នឹងកើតឡើងជាប្រចាំតាមរយ:ការពិភាក្សាផ្លាស់ប្ដូរនូវកិច្ចសហប្រតិបត្តិការ និងបញ្ហាដែលជាកង្វល់រួម។
៣.ភាគីទាំងពីរត្រូវបន្តខិតខំធ្វើកិច្ចសហប្រតិបត្តិការរួមគ្នា ហើយសង្ឃឹមថា នឹងឈានដល់គ្រប់លក្ខខណ្ឌបង្កើតសម្ព័ន្ធមេត្រីភាពរវាងខេត្ត-ក្រុងទាំងពីរ។ និង៤. លិខិតផ្ដួចផ្ដើមនេះត្រូវបានចុះហត្ថលេខានាថ្ងៃទី១៤ ខែមិថុនា ឆ្នាំ២០២៣ នឹងចូលជាធរមានចាប់ពីថ្ងៃចុះហត្ថលេខាតទៅ ដោយធ្វើឡើងជាបីភាសា ខ្មែរ ចិន និងអង់គ្លេស ដែលមានតម្លៃស្មើៗគ្នាចំពោះមុខច្បាប់៕
