ភ្នំពេញ ៖ សម្តេច សាយ ឈុំ ប្រមុខរដ្ឋស្តីទីនៃកម្ពុជា បានលើកឡើងថា ការគាំទ្ររបស់រដ្ឋាភិបាលអាល្លឺម៉ង់ បានរួមចំណែកដ៏សំខាន់ ក្នុងការអភិវឌ្ឍសង្គម-សេដ្ឋកិច្ចកម្ពុជា ឲ្យមានការរីកចម្រើនជាបន្តបន្ទាប់។
ក្នុងឱកាសទទួលបដិសណ្ឋារកិច្ច លោកបណ្ឌិត ហ្វ្រាំង វ៉ាល់ធ័រ ឆ្តែនម៉ៃយ័រ (Frank-Walter Steinmeier) ប្រធានាធិបតីអាល្លឺម៉ង់នាថ្ងៃ១៥ កុម្ភៈ ប្រមុខរដ្ឋស្តីទី បានវាយតម្លៃខ្ពស់ និងពេញចិត្តជាខ្លាំងចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរ។ ទន្ទឹមនឹងនេះ ប្រទេសទាំងពីរបាននិងកំពុងបន្តរីកចម្រើនទំនាក់ទំនងផ្នែកនយោបាយ សេដ្ឋកិច្ច ពាណិជ្ជកម្ម សុខាភិបាល វប្បធម៌ អប់រំ និងការផ្លាស់ប្តូររវាងប្រជាជននិងប្រជាជន។
សម្តេចប្រមុខរដ្ឋស្តីទី បានកត់សម្គាល់ដោយសេចក្តីពេញចិត្តចំពោះទំហំពាណិជ្ជកម្មរវាងប្រទេសទាំងពីរដែលមានកំណើនជាលំដាប់ ក្នុងនោះអាល្លឺម៉ង់ ជាប្រទេសឈរលំដាប់ថ្នាក់ទី១ មានទំហំពាណិជ្ជកម្មធំជាងគេជាមួយកម្ពុជាក្នុងចំណោមបណ្តាប្រទេសនៅសហភាពអឺរ៉ុប ក្នុងឆ្នាំ២០២២ មានកំណើនចំនួន ៤% បើធៀបនឹងឆ្នាំ២០១៩ មុនពេលមានជំងឺកូវីដ-១៩។
ក្នុងនាមរាជរដ្ឋាភិបាលកម្ពុជា សម្តេចប្រមុខរដ្ឋស្តីទី បានថ្លែងអំណរគុណចំពោះ រដ្ឋាភិបាលអាល្លឺម៉ង់ ដែលបានផ្តល់ជំនួយកិច្ចសហប្រតិបត្តិការអភិវឌ្ឍ ហិរញ្ញប្ប ទានសម្បទាន ហិរញ្ញប្បទានឥតសំណង ក្នុងវិស័យអាទិភាពជាច្រើនចាប់តាំងពីឆ្នាំ១៩៩៤ មក រួមមាន៖ វិស័យអប់រំ, សុខាភិបាលនិងគាំពារសង្គម, ការអភិវឌ្ឍប្រកបដោយចីរភាព, អភិបាលកិច្ច, វប្បធម៌, ការកាត់បន្ថយភាពក្រីក្រ និងការបោសសម្អាតមីន។ សម្តេចប្រមុខរដ្ឋស្តីទី បានបញ្ជាក់ថា «ការគាំទ្រដ៏ថ្លៃថ្លារបស់រដ្ឋាភិបាលអាល្លឺម៉ង់ បានរួមចំណែកដ៏សំខាន់ក្នុងការអភិវឌ្ឍសង្គម-សេដ្ឋកិច្ចកម្ពុជាមានការរីកចម្រើនជាបន្តបន្ទាប់»។
ចំណែកលោកប្រធានាធិបតីអាល្លឺម៉ង់វិញ បានវាយតម្លៃខ្ពស់ចំពោះការរីកចម្រើនយ៉ាងឆាប់រហ័សរបស់កម្ពុជា ជាមួយនឹងភាពសម្បូរបែបនៃវប្បធម៌ ជាពិសេសកម្ពុជាបានដាក់ចេញគោលនយោបាយប្រព័ន្ធការពារសុខុមាល- ភាពសង្គម កែលម្អគោលនយោបាយអភិវឌ្ឍន៍សង្គម-សេដ្ឋកិច្ចឲ្យមានការរីកចម្រើនប្រកបចីរភាពក្នុងរយៈពេលជាងពីរទសវត្សរ៍ចុងក្រោយនេះ។
លោកថា តាមរយៈដំណើរទស្សនកិច្ចរបស់គណៈប្រតិភូនាពេលនេះ បង្ហាញពីការពង្រឹងពង្រីកទំនាក់ទំនង និងកិច្ចសហប្រតិបត្តិការដែលមានស្រាប់ក្នុងពេលបច្ចុប្បន្ន ក៏ដូចជាការបន្តកិច្ចសហការប្រតិបត្តិការនៅពេលអនាគត។
សូមបញ្ជាក់ថា ដំណើរទស្សនកិច្ចលោក ហ្រ្វាំង វ៉ាល់ធ័រ ស្ដែនម៉ៃយ័រ ប្រធានាធិបតីអាល្លឺម៉ង់ និងភរិយានៅកម្ពុជា ជាទស្សនកិច្ចប្រវត្តិសាស្ត្រដែលលោកបានមកកាន់កម្ពុជាលើកដំបូង ក្រោយការបង្កើតទំនាក់ទំនងការទូតនឹងគ្នាជាថ្មីនៅក្នុងឆ្នាំ១៩៩៤។ កម្ពុជា-អាល្លឺម៉ង់ មានទំនាក់ទំនងការទូតតាំងពីឆ្នាំ១៩៦៧មក ប៉ុន្តែត្រូវបានអាក់ខានទៅវិញក្នុងចន្លោះឆ្នាំ១៩៦៩-១៩៩៣។ លុះដល់ឆ្នាំ១៩៩៤ ក្រោយការបោះឆ្នោតជាសកលលើកដំបូងនៅកម្ពុជា រៀបចំដោយអង្គការសហប្រជាជាតិ គឺកម្ពុជា-អាល្លឺម៉ង់ ក៏បានភ្ជាប់ទំនាក់ទំនងការទូតជាផ្លូវការឡើងវិញ រហូតមកសព្វថ្ងៃ៕ ដោយ៖ ពុទ្ធិពល